Իրանի հետ միջուկային գործարքի վերականգնման հարցով ԱՄՆ բանակցողների թիմը չի կարող համակարծիք լինել այն հարցում, թե արժե արդյոք խստացնել Թեհրանի նկատմամբ պատժամիջոցները, հաղորդում է The Wall Street Journal-ը:
Իրանի հետ գործարքի շուրջ ԱՄՆ բանակցող թիմը չի կարողանում համաձայնության հասնել
Քանի որ 2015 թվականի Իրանի միջուկային համաձայնագրի վերականգնման շուրջ բանակցությունները հասել են կրիտիկական փուլի, ԱՄՆ-ի թիմում տարաձայնություններ են առաջացել այն բանի շուրջ, թե որքանով է անհրաժեշտ խստացնել գոյություն ունեցող հակաիրանական պատժամիջոցները և երբ ավարտել բանակցությունները:
Ինչպես պարբերականին հայտնել են ԱՄՆ-ի պաշտոնատար անձինք, այդ տարաձայնությունների պատճառով անցյալ հանգստյան օրերին իր պաշտոնը լքել է Իրանի հարցով հատուկ բանագնաց Ռիչարդ Նեֆյուն ՝ Իրանի նկատմամբ նախորդ տնտեսական պատժամիջոցների ճարտարապետը։ Նա հանդես է եկել ներկայիս բանակցություններում ավելի կոշտ դիրքորոշման օգտին:
Թերթի զրուցակիցների խոսքով ՝ ինքը դեկտեմբերի սկզբից Վիեննայում չի մասնակցել բանակցություններին։ Բանակցային խմբի մյուս երկու անդամները որոշել են հրաժարվել բանակցություններին մասնակցելուց այն պատճառով, որ ավելի կոշտ մոտեցման մասին կիսում էին Նեֆյուի կարծիքը։ Ավելի վաղ ԱՄՆ պետքարտուղար Էնթոնի Բլինկենը կոչ էր արել առաջիկա շաբաթներին համաձայնության հասնել Վաշինգթոնի և Թեհրանի ՝ ԳՀՀԾ-ին վերադարձնելու շուրջ, այլապես հետո գործարքի վերականգնումն արդեն անիմաստ կլինի:
«Մենք կարող ենք այդ բանակցությունները հաջող ավարտին հասցնել և լուծել այն հիմնական հարցերը, որոնք անհանգստություն են առաջացնում, բայց ժամանակն ավարտվում է», - հայտարարել է Բլինկենը Գերմանիայի ԱԳ նախարար Աննալենա Բերբոկի հետ կայացած մամուլի ասուլիսում: «Եթե մենք համաձայնագիր չկնքենք առաջիկա շաբաթներին, Իրանի առաջընթացը միջուկային զենքի բնագավառում թույլ չի տա մեզ վերադառնալ ԳՀՀԾ», - ընդգծել էր պետքարտուղարը:
Ներկայում Վիեննայում ընթանում է Իրանի և ԱՄՆ-ի՝ իրանական միջուկային ծրագրի շուրջ համաձայնագրին վերադառնալու շուրջ բանակցությունների ութերորդ փուլը:
