Կրեմլի պաշտոնական էջի փոխանցմամբ, քննարկվել է Ղազախստանում ՀԱՊԿ խաղաղապահ ուժերի գործունեությունը, նշվել է, որ խաղաղապահ ուժերի գործողությունների արդյունավետ համակարգումը նպաստել է  այդ երկրում  իրավիճակի կարգավորմանը։

Քննարկվել են նաև ԼՂ-ի շուրջ ընթացիկ իրադրությունը, 2020 թ. նոյեմբերի 9-ին ու 2021 թ. նոյեմբերի 26-ին ստորագրված եռակողմ  հայտարարություններով նախատեսված պայմանավորվածությունների կատարման ընթացքի մասին հարցեր։ Կողմերը պայմանավորվել են շարունակել շփումները տարբեր մակարդակներով։

Ուշագրավ է, որ Կրեմլի  պաշտոնական էջում հրապարակված տեղեկատվության մեջ որևէ անդրադարձ չկա հայ-ադրբեջանական սահմանում տեղի ունեցած փոխհրաձգությանը, որի հետևանքով կան զոհեր և վիրավորներ։

Հայկական կողմը հեռախոսազրույցի ու դրա բովանդակության մասին դեռ հաղորդագրություն չի տարածել։

Հիշեցնենք, որ երեկ Ղազախստանի նախագահ Տոկաևը հայտարարել է, որ ՀԱՊԿ խաղաղապահ ուժերն իրենց առաքելությունը հաջողությամբ ավարտել են։ Հունվարի 13-ից կմեկնարկի ՀԱՊԿ ուժերի դուրս բերումը Ղազախստանից, որը կտևի տասն օր։