Մոսկվայի շրջանային դատարանը 2019 թվականի ամռանը ՌԴ գլխավոր հետախուզական վարչության հատուկ նշանակության ջոկատի նախկին զինծառայող Նիկիտա Բելյանկինի սպանության քրեական գործի շրջանակում հրապարակել է ինը մեղադրյալի դատավճիռները:
Մոսկվայի շրջանային դատարանը 9 հայի 5-20 տարվա ազատազրկման է դատապարտել ՌԴ գլխավոր հետախուզական վարչության նախկին զինծառայողի սպանության գործով
ՍՏԵՓԱՆԱԿԵՐՏ, 27 դեկտեմբերի, ԱՐՑԱԽՊՐԵՍ։ Tert.am-ի փոխանցմամբ, այս մասին հաղորդում է ՏԱՍՍ-ը, առավելագույն ժամկետը՝ 20 տարի ազատազրկում, ստացել է Սերգեյ Խոջոյանը, որը դանակով մահացու հարված է հասցրել Բելյանկինին։
Եղբայրներ Համլետ և Հրանտ Հայրապետյանները, որոնք, դատարանի որոշմամբ, սպանության պահին պահել են Բելյանկինին, ինչպես նաև «ակտիվորեն մասնակցել» երկու ռեանիմատոլոգների ծեծի ենթարկելուն, համապատասխանաբար 17 և 18 տարվա ազատազրկման են դատապարտվել խիստ ռեժիմի գաղութում։
Նվազագույն պատիժը՝ 5 տարի ընդհանուր ռեժիմի գաղութում, ստացել է Նարեկ Ստեփանյանը, իսկ Արթուր Հակոբյանը, Դավիթ Եղիազարյանը, Սուրեն Մարկոսյանը, Ռուդիկ Մանուկյանը, Սահակ Սահակյանը դատապարտվել են 5,5-ական տարվա ազատազրկման։
Մեղադրյալների պաշտպանության ներկայացուցիչները կբողոքարկեն դատավճիռը։ Այս մասին ՏԱՍՍ-ին հայտնել է դատապարտյալներից մեկի փաստաբան Նարեկ Կոստանյանը։
Ինչպես հաստատվել է հետաքննության և դատարանի կողմից, 2019 թվականի հունիսի 1-ին մերձմոսկովյան Կրասնոգորսկի Պուտիլկովո գյուղում սրճարանի տնօրեն Գուրգեն Աղայանը անհիմն պահանջել է, որ երկու այցելուներ՝ ռեանիմատոլոգներ, հեռանան հաստատությունից։ Կոնֆլիկտի մեջ են մտել ևս 9 հոգի, որոնք ալկոհոլային ազդեցության տակ մոտեցել են սրճարանին և ծեծկռտուք սկսել։
«Գլխին ուժեղ հարված ստանալով՝ տղամարդկանցից մեկը կորցրել է գիտակցությունը և ընկել, երկրորդը փորձել է դիմադրել, սակայն դանակով վիրավորվել է որովայնից և արյունահոսելով պառկել, մինչդեռ չորս հոգի շարունակել են հարվածել նրան, իսկ յոթը շրջապատել են նրանց՝ թույլ չտալով հեռանալ դեպքի վայրից: Ծեծկռտուքը նկատել է ԳՀՎ հատուկ նշանակության ջոկատի նախկին զինծառայող Նիկիտա Բելյանկինը, որը, տեսնելով հակառակորդների անհավասար ուժերը, բղավել է խուլիգանների վրա և տրավմատիկ ատրճանակից օդ կրակել՝ պահանջելով կանգ առնել ու վերջ տալ անօրինական գործողություններին»,- նշել է Քննչական կոմիտեն։
Մեղադրական եզրակացությունից հետևում է, որ կոնֆլիկտի մի քանի մասնակիցներ վազել են Բելյանկինի մոտ և սկսել են միաժամանակ բազմաթիվ հարվածներ հասցնել նրան, սակայն նա նրանց ակտիվ դիմադրություն է ցույց տվել։ Եղբայրներ Համլետ, Հրանտ և Հովհաննես Հայրապետյանները բռնել են Բելյանկինին՝ շարունակելով հարվածել, իսկ Սերգեյ Խոջայանը դանակով հարվածել է սրտի շրջանում։ Մնացած տղամարդիկ շրջապատել են տուժածներին և թույլ չեն տվել հեռանալ դեպքի վայրից։
