Ստեփանակերտի Պոլ Էլյուարի տուն ֆրանկոֆոնիայի կենտրոնում նախօրեին բացվել է արցախցի ժամանակակից գեղանկարիչների՝ Գայանե Շուշեցու, Զորիկ Գալստյանի, Հրանտ Մնացականյանի, Ռաֆայել Պետրոսյանի, Մերի Մուսայելյանի, Սերգեյ Առուստամյանի, Օնիկ Գասպարյանի, Լիանա Քոչարյանի, Դավիթ Առստամյանի և Սամվել Թավադյանի ստեղծագործությունների ցուցահանդեսը՝ «Հայրենիքը դժգույն չի լինում» խորագրով։
Ստեփանակերտում բացվել է արցախցի ժամանակակից գեղանկարիչների աշխատանքների ցուցահանդես
ՍՏԵՓԱՆԱԿԵՐՏ, 25 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ բացմանը նախ հարգանքի տուրք է մատուցվել հանուն հայրենիքի նահատակված հերոսների հիշատակին:
«Շուշի քաղաքի թանգարաններ» ՊՈԱԿ-ի տնօրեն Լուսինե Գասպարյանի խոսքով ցուցահանդեսին ներկայացված գրեթե բոլոր նկարիչների բոլոր գործերում հայրենիք բարձրագույն կատեգորիան է՝ Հայրենիքը, այն հայրենիքը, որը մենք պետք է շենացնենք։
Քանդակագործ Յուրի Հովհաննիսյանը բարձր է գնահատել նկարիչների աշխատանքները, նշելով, որ նկարների գունային երանգները ապրեցնող են։ Երիտասարդ նկարչուհի Մերի Մուսայելյանը մեզ հետ զրույցում անկեղծացավ՝ պատերազմից հետո ցուցահանդեսին մասնակցելը նման է վերածննդի։ «Պատերազմից հետո շատ դժվար է ծանր հոգեվիճակով ստեղծագործելը։ Բայց մենք՝ նկարիչներս, մեր վրձնով պետք է ապացուցենք, որ Արցախը միշտ վառ է ու տաք»,-նշել է Մ. Մուսայելյանը։
Ցուցահանդեսը կտևի 15 օր։ Այն կազմակերպվել էր Արցախի նկարիչների միության և Շուշիի կերպարվեստի պետական թանգարանի նախաձեռնությամբ։
