Այսօր՝ դեկտեմբերի 23-ին, Ստեփանակերտի պատկերասրահում բացվել է հայր և դուստր Առնոլդ և Աստղիկ Մելիքսեթյանների անհատական ցուցահանդեսը։
Ստեփանակերտում բացվել է հայր և դուստր Մելիքսեթյանների անհատական ցուցահանդեսը
ՍՏԵՓԱՆԱԿԵՐՏ, 23 դեկտեմբերի, ԱՐՑԱԽՊՐԵՍ։ Առնոլդ Մելիքսեթյանն Արցախում հայտնի նկարիչ-քանդակագործ է, մոտ 60 տարի ստեղծագործում է գեղանկարչության, գրաֆիկայի և քանդակի, Աստղիկը՝ գեղանկարչության և կիրառական արվեստի ասպարեզներում։
«Ցուցահանդեսին ներկայացրել ենք ընդհանուր 70 գործ՝ գեղանկարներ, գրաֆիկական նկարներ, քանդակներ, որոնց մոտավորապես կեսը վերջին մի քանի տարվա ստեղծագործություններ են։ Ցուցադրված են նաև 30-35 տարվա գործեր», - նշեց Ա. Մելիքսեթյանը:ԿԳՄՍ նախարարի տեղակալ Գայանե Գրիգորյանը ցուցահանդեսը յուրահատուկ համարեց մի քանի առումով:
«Բոլորիս հայտնի նկարիչ-քանդակագործն իր ցուցահանդեսում նաև ընդգրկել է դստեր Աստղիկի գործերը, ինչպես նաև առաջին անգամ ցուցադրվում է նրանց ստեղծած «Գանձասար» գորգը: Ամենակարևորն այն է, որ արվեստագետը շարունակում է աշխատել և արարել,-նշեց ԿԳՄՍ փոխնախարարը՝ հավելելով, որ հնարավորություններ ունենալու դեպքում, կաջակցեն նկարիչներին, քանդակագործներին, որպեսզի նրանք կարողանան իրենց ստեղծագործությունները ցուցադրել ոչ միայն Արցախում, այլ նաև միջազգային ցուցահանդեսներում։
ԼՂՀ վաստակավոր լրագրող, հրապարակախոս, թարգմանիչ Միքայել Հաջյանի համոզմամբ՝ Արցախը ունի ևս մեկ խորհրդանիշ՝ Առնոլդ Մելիքսեթյանին, ում գործերը ոչ միայն արցախյան, այլև համաշխարհային նշանակության արժեքներ են:«Արցախպրես»-ի թղթակցի հաղորդմամբ՝ Ստեփանակերտի պատկերասրահի տնօրեն Ելենա Դադայանը պատվոգիր հանձնեց Առնոլդ Մելիքսեթյանին՝ Արցախում արվեստի և մշակույթի զարգացման ու տարածման համար:
Ցուցահանդեսը բաց կլինի մինչև դեկտեմբեր ամսվա վերջ:
