Այսօր՝ դեկտեմբերի 8-ին, Ստեփանակերտի պատկերասրահում տեղի է ունեցել Արցախյան 44-օրյա պատերազմի ժամանակ Բերձորի պաշտպանության մասնակից, նկարիչ Սևադա Սարգսյանի՝ առաջնագծում արված էսքիզների հիման վրա ստացված գրաֆիկական, ինչպես նաև պաստելով և յուղաներկով աշխատանքների ցուցահանդեսը:
«Հայոց վարքականոնը շարունակում է մնալ ստեղծագործ աշխատանքը». Ստեփանակերտում կազմակերպվել է «Դժոխքի ձոր» խորագրով ցուցահանդեսը
ՍՏԵՓԱՆԱԿԵՐՏ, դեկտեմբերի 8, ԱՐՑԱԽՊՐԵՍ։ Այն կրում էր «Դժոխքի ձոր» խորագիրը և կազմակերպվել է ԱՀ ԿԳՄՍ նախարարության նախաձեռնությամբ, համակարգվել՝ «Շուշի քաղաքի թանգարաններ» ՊՈԱԿ-ի կողմից։
Ցուցահանդեսը մեկնարկեց Արցախյան երեք պատերազմներում նահատակված քաջորդիների հիշատակին հարգանքի տուրք մատուցելով։
«Արցախպրես»-ի թղթակցի հետ զրույցում Սևադա Սարգսյանն անկեղծացավ՝ պատերազմի ժամանակ մարտի դաշտում կռվել է ոչ միայն զենքով, այլ նաև՝ վրձնով:
«Մարտական գործողությունները տեղի են ունեցել «Դժոխքի ձոր» կոչվող հատվածում: Բացի այն, որ ցուցահանդեսն արտացոլում է 44-օրյա պատերազմից ունեցած իմ անմիջական տպավորությունները, «Դժոխքի ձոր» նկարաշարն արտացոլում է միասնության գաղափարի կարևորությունը, կորստի մորմոքը, պայքարելու եռացող կամքն ու հավատը ապագայի նկատմամբ: Ես խոնարհվում եմ մեր նահատակված և ողջ մնացած հերոսների առջև: Տա Աստված, որ իմ հաջորդ ցուցահանդեսը կրի «Ծաղկունյաց լեռներ» խորագիրը»,- նշել է նկարիչը:
«Շուշի քաղաքի թանգարաններ» ՊՈԱԿ-ի տնօրեն Լուսինե Գասպարյանի խոսքով՝ ցուցահանդեսի գաղափարը ծագել էր պատերազմի ամենադժնդակ օրերին: «Պատերազմի օրերին Սևադան Դժոխքի ձորում էր պայքարում: Ճիշտն ասած` մենք բոլորս էինք դժոխքում: Այդ ժամանակ ես նրան խոստացա, որ երբ ամեն ինչ վերջանա, մենք ցուցահանդես ենք կազմակերպելու: Նա մարտադաշտում շարունակեց արվեստագետ մնալ, ստեղծագործեց, էսքիզներ ստեղծեց և այդ էսքիզներն այսօր ցուցադրվում են»,- նշել է Լ. Գասպարյանը:
Մեզ հետ զրույցում ԱՀ ԿԳՄՍ նախարար Լուսինե Ղարախանյանն ասաց, որ մեր հոգու առեղծվածում կա ու շարունակում է որպես վարքականոն մնալ ստեղծագործ աշխատանքը:
«Այսօր, հաղթահարելով դժոխքը, դժոխքի հատակից դուրս գալով, հայոց վարքականոնը շարունակում է մնալ ստեղծագործ աշխատանքը: Մենք շարունակում ենք վերքերից երգեր շինել: Ուսումնասիրելով Սևադայի նկարները՝ հասկացա, որ բոլոր նկարները պատերազմոտ են, և բոլոր նկարներում տագնապ կա, բայց այդ նկարներում, զարմանալիորեն, այգաբաց կա, դժոխքին փոխարինող դրախտի բարձունքներ կան, որտեղից երևում է լույսը: Կեցցե նա, որ պատերազմել է, և կեցցե, որ այդ օրերին չի կորցրել իր գեղագիտական ճաշակն ու կարողությունները»,- ընդգծել է Լ. Ղարախանյանը:
ԱՀ ԿԳՄՍ նախարարը Սևադա Սարգսյանին է հանձնել նախարարության կողմից հրատարակված «Շուշի» գիրքն ու Հադրութի «Մանկապատանեկան ստեղծագործական» կենտրոնի սաների` այս տարի գորգագործության մրցույթում առաջին մրցանակային տեղը զբաղեցրած աշխատանքը։
