Արցախի մայրիկների ակումբը նախաձեռնել է իրականացնել 2020թ. Արցախյան 44-օրյա պատերազմի ժամանակ զոհված հերոսների, 1-ին, 2-րդ, 3-րդ կարգի հաշմանդամություն ստացածների երեխաների Ամանորյա երազանքները։
Պատերազմում զոհված, հաշմանդամություն ստացած հերոսների երեխաների Ամանորյա երազանքները կիրականանան. Արցախի մայրիկների ակումբը ծրագիր է իրականացնում
ՍՏԵՓԱՆԱԿԵՐՏ, 8 դեկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասաց ակումբի հիմնադիր Լիլիթ Պետրոսյանը: «Պատերազմում ամուսնուս եմ կորցրել: Անցած տարի Հայաստանից բազմաթիվ կազմակերպություններ անընդհատ ինձ հետ կապվում էին, որ նամակ գրենք։
Արդեն երազանքներ չէին մնացել, բոլորն իրականացրեցին։ Ամեն օր 3-5 ՀԿ-ներ, կամ անծանոթ անհատներ մեր տուն էին գալիս, որ աղջկաս ուրախացնեն։ Նրանք այնքան ջերմություն տվեցին, այնքան հոգատարություն, որ փոքրիկս, կարծեք, հաղթահարեց սթրեսը։
Որոշեցի, որ այս տարի Արցախի մայրիկների ակումբում նույնը պիտի անենք, որովհետև անթիվ կանայք պատրաստ են ամեն ինչ անել, որ պատերազմի հետևանքով տուժած երեխաներին երջանկություն պարգևեն` գոնե մի քանի ժամով։ Ակումբը միակ հարթակն է, որտեղ կարող եմ ամեն ինչ վերահսկել: Մարդիկ վստահում են ինձ, ամեն ինչ փաստաթղթերով է իրականացվում»,-նշեց Լ. Պետրոսյանը։ Մեր զրուցակցի խոսքով՝ Արցախի մայրիկների ակումբում սա առաջին ծրագիրը չէ. միշտ էլ բարեգործական ծրագրեր ունեցել են:
«Նախաձեռնությունը շարունակական կլինի։ Ամեն օր անթիվ նամակներ եմ ստանում էլֆերից, բողոքում են, որ չեն հասցնում նամակի էլֆ դառնալ, որովհետև վայրկյաներ անց արդեն էլֆեր են գտնվում։ Անթիվ մարդիկ սպասում են, որ հաշիվ բացենք, որ փոխանցեն գումար: Սկզբում, երբ հաշմանդամություն ստացածների երեխաների նամակներն էինք ընդունում, շատ քիչ նամակներ կային, դեռ 2 օր է զոհվածների երեխաների նամակներն ենք ընդունում ու արդեն 45 նամակ ունենք։ Շատ են դիմում, որ էլֆ լինեն հենց զոհվածների կանայք, նրանց մեծ մասը ցանկանում է, որ անունը չնշեմ։ Զարմանալի է, բայց այսպիսին է հայի կին տեսակը»,- հավելեց մեր զրուցակիցը։ Երեխաների նամակներն ուղարկելու և լրացուցիչ տեղեկատվության համար ցանկացողները կարող են անցնել հետևյալ հղումով։
