Այսօր Ստեփանակերտի պատկերասրահում կրթամշակութային ծրագրի շրջանակներում կազմակերպվել է հայազգի հանճարեղ ծովանկարիչ Հովհաննես Այվազովսկու կենսագրության և ստեղծագործական ուղու, նրա թողած ժառանգության մասին պատմող ֆիլմի դիտում և ինտելեկտուալ խաղ:
Մայրաքաղաքի պատկերասրահում հայազգի աշխարհահռչակ ծովանկարիչ Այվազովսկուն նվիրված միջոցառում է կազմակերպվել
ՍՏԵՓԱՆԱԿԵՐՏ, 1 դեկտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ` ինտելեկտուալ խաղի մասնակիցները Շուշիի տեխնոլոգիական համալսարանի ուսանողներն են:
Մեզ հետ զրույցում պատկերասրահի էքսկուրսավար Նոնա Գրիգորյանը նշեց, որ, լինելով համաշխարհային համբավ ունեցող նկարիչ, Այվազովսկին առավել հայտնի է իր ծովանկարներով, որոնք նրա թողած ժառանգության զգալի մասն են կազմում։
«Այս օրերին Այվազովսկուն նվիրված միջոցառումներ ենք նախաձեռնել` մեր հերթին այս կերպ ևս մեկ անգամ արժևորելով նման մեծության գործունեությունը։ Ողջունելի է Շուշիի տեխնոլոգիական համալսարանի ուսանողների ցուցաբերած ակտիվությունը հասարակական, մշակութային տարբեր միջոցառումներին: Այսօր մասնակիցները ավելի խորը ծանոթացան Այվազովսկու կերպարին, նկարչի կյանքի հետ կապված հետաքրքիր դրվագներին, ամենահայտնի կտավներին», - նշեց Ն. Գրիգորյանը:
