ՍՏԵՓԱՆԱԿԵՐՏ, 28 հոկտեմեբրի, ԱՐՑԱԽՊՐԵՍ։ Խաղի հաշիվը բացվել է միայն երկրորդ կեսում. 52-րդ րոպեին տանտերերի կազմում Լեոնարդո Պավոլետին գրավել է հռոմեացիների դարպասն ու առաջ մղել իր թիմին: «Ռոման» հաշվի հավասարակշռությունը վերականգնել է մոտ 20 րոպե անց, երբ Ռոժեր Իբանյեսը խփել է պատասխան գնդակը: 78-րդ րոպեին էլ Լորենցո Պելեգրինին խփել է «Ռոմայի» երկրորդ գնդակն այս խաղում ու հաղթանակ պարգևել իր թիմին:

Հայաստանի ազգային հավաքականի և «Ռոմայի» կիսապաշտպան Հենրիխ Մխիթարյանն իր թիմի մեկնարկային կազմում է դուրս եկել խաղադաշտ, սակայն փոխարինվել է ընդմիջմանը: Առաջին կեսի վերջնամասում հայ ֆուտբոլիստը զգացել է բժիշկների օգնության կարիքը, փոխանցում է armsport-ը:

Այս հանդիպումից հետո «Ռոման» իր միավորների թիվը հասցրել է 19-ի և բարձրացել Ա Սերիայի մրցաշարային աղյուսակի 4-րդ հորիզոնականը: «Կալյարին» 6 միավորով գտնվում է վերջին՝ 20-րդ տեղում:

Տուրի մյուս խաղում «Ինտերը» հյուրընկալվելիս մրցել է «Էմպոլիի» հետ և 2 անպատասխան գնդակ ուղարկել մրցակցի դարպասը: «Ինտերի» կազմում խաղի հաշիվը 34-րդ րոպեին բացել է Դանիլո Դ՛Ամբրոսիոն, իսկ Ֆեդերիկո Դիմարկոն 67-րդ րոպեին կրկնապատկել է իր թիմի առավելությունը: Նշենք՝ երկրորդ կեսի մեկնարկում «Էմպոլին» մնացել է 10 հոգով՝ Սամուելե Ռիկիի հեռացումից հետո, իսկ հանդիպման վերջնամասում «Ինտերը» կարող էր երրորդ գոլը խփել, սակայն VAR-ի օգնությանը դիմելուց հետո գլխավոր մրցավարը ձեռքով խաղ է արձանագրել ու չեղարկել Գալյարդինիի գոլը:

Այս խաղից հետո «Ինտերն» իր միավորների թիվը հասցրել է 21-ի և Ա Սերիայի մրցաշարային աղյուսակի 3-րդ հորիզոնականն է զբաղեցնում:

Տուրի մյուս խաղում էլ «Լացիոն» Պեդրոյի խփած միակ գոլի շնորհիվ տանը հաղթել է «Ֆիորենտինային»: