Արցախյան «Այ Թի» ոլորտում գործող «Կապիտալ Սոֆթ» ընկերությունը հետպատերազմական շրջանում շարունակում է իր գործունեությունը և տեղեկատվական տեխնոլոգիաների մասնագետներ պատրաստում:
Արցախյան «Այ Թի» ոլորտում գործող ընկերությունը պարբերաբար դասընթացներ է կազմակերպում. արդյունքները ներկայացնում է տնօրենը
ՍՏԵՓԱՆԱԿԵՐՏ, 27 հոկտեմեբրի, ԱՐՑԱԽՊՐԵՍ: «Կապիտալ Սոֆթ» ՍՊԸ տնօրեն Արթուր Մնացականյանը «Արցախպրես»-ի թղթակցի հետ զրույցում ասել է, որ ընկերությունը ստեղծվել է 2017 թվականին և գործունեության կարճ ժամանակահատվածում արդեն հասցրել է գրանցել որոշակի հաջողություններ:
«Ընկերության կողմից կազմակերպվող տեղեկատվական տեխնոլոգիաների դասընթացները նպատակ ունեն այդ ոլորտում նոր աշխատակիցների ներգրավելու: Պատերազմից հետո փորձեցինք նոր աշխատակիցների ընդգրկել ընկերությունում, հատկապես՝ ծրագրավորմամբ հետաքրքրվող երիտասարդների, և վերջնական փուլում հաջողություն գրանցելուց հետո այդ մարդկանց ընդունել աշխատանքի: Ընկերության հիմնադրումից ի վեր անց ենք կացրել 3 դասընթաց: Նախնական դասընթացին դիմել էին 30 հոգի. 6 ամսվա ընթացքում յուրաքանչյուր փուլում անց ենք կացրել քննություն և ընտրել մեր մասնակիցներին»,- ներկայացրել է Ա. Մնացականյանը և հավելել, որ դասընթացների արդյունքում առաջադիմություն ցուցաբերած անձանցից 9֊ը անցել են աշխատանքի։ Իսկ «Կապիտալ Սոֆթ»-ը պատերազմից հետո արցախյան բոլոր «Այ Թի» ընկերություններում ամենաշատ աշխատակիցներ ընդունող ընկերությունն է. ընդ որում դասընթացները բացառապես անվճար են: Դրանց հիմնական ուղություններ են բիզնես գաղափարների նախագծումը, ավտոմատացումը, թվայնացումը։
«Ունենք պատվերներ՝ ինչպես տեղում, այնպես էլ՝ արտասահմանից: Ընկերությունն ունի 30% արդյունավետության գործակից, որը «Այ Թի» ոլորտում, դասընթացների մասնակիցների քանակի համեմատ, համարվում է շատ բարձր ցուցանիշ»,- ընդգծել է Ա. Մնացականյանը:
