Ընթացիկ տարվա հոկտեմբեր ամսվա սկզբին Ստեփանակերտի «Արևիկ» մանկական բուժմիավորման ինֆեկցիոն բաժանմունքն սկսել է ընդունել կորոնավիրուսային հիվանդությամբ վարակված հիվանդների, կամ վարակվածության կասկածով անձանց:
Կորոնավիրուսային հիվանդության պարագայում ինքնաբուժությամբ զբաղվելն արգելվում է. բժիշկ֊վարակաբան
ՍՏԵՓԱՆԱԿԵՐՏ, 22 հոկտեմեբրի, ԱՐՑԱԽՊՐԵՍ։Ինֆեկցիոն բաժանմունքում բուժում ստացող հիվանդների ընդհանուր վիճակի մասին «Արցախպրես»-ի թղթակիցը զրուցել է «Արևիկ» մանկական բուժմիավորման ինֆեկցիոն բաժանմունքի բժիշկ-վարակաբան Անուշ Գալստյանի հետ:
«Առայսօր ընդունել ենք 41 հիվանդի: Բոլոր հիվանդները հիմնականում ունեն թոքաբորբ: Նրանցից շատերը առողջ վիճակում դուրս են գրվել:
Այսօրվա դրությամբ բուժում է ստանում 21 հիվանդ, որից 10-ի մոտ հաստատվել է կորոնավիրուսային հիվանդության թեստի դրական պատասխան, իսկ մյուսների մոտ թեստի պատասխանը դեռ պատրաստ չէ: Մեր բաժանմունքում, պայմանավորվածության համաձայն, ընդունում ենք միջին ծանրության հիվանդների, ովքեր ունենում են 90-ից բարձր սատուրացիա, չեն ունենում ծանր քրոնիկ պաթոլոգիաներ, ուղեկցող այլ հիվանդություններ, գտնվում են կոնպենսացված վիճակում»,- ասել է Ա. Գալստյանը:
Բժիշկ-վարակաբանի խոսքով, եթե հիվանդները ունեն գանգատներ՝ բարձր ջերմություն, ընդհանուր թուլություն, հազ, սրտխառնոց, գլխապտույտ, մկանային և հոդերի ցավ,ապա անհրաժեշտ է դիմել բժշկի, քանի որ հենց դրանք կարող են հանդիսանալ կորոնավիրուսային հիվանդության ախտանիշներ։
«Վարակի առկայության դեպքում, առաջին հերթին, պետք չէ խուճապի մատնվել: Ինքնաբուժությամբ չի կարելի զբաղվել, անհրաժեշտ է դիմել մասնագետին, և հետևել նրա խորհուրդներին»,- հավելել է մեր զրուցակիցը:
