Երևանում կայացել է արցախցի երիտասարդ գրականագետի գրքի շնորհանդեսը
Երևանի պետական համալսարանում սեպտեմբերի 23-ին «Համազգային հայ կրթական և մշակութային միության» Երևանի գրասենյակի նախաձեռնած, արձակագիր, հրապարակախոս, հասարակական գործիչ Հակոբ Կարապենցին նվիրված գիտաժողովի շրջանակներում կայացել է արցախցի երիտասարդ գրականագետ Նանար Սիմոնյանի «Հակոբ Կարապենցի ստեղծագործությունը» գրքի շնորհանդեսը:
Երևանում կայացել է արցախցի երիտասարդ գրականագետի գրքի շնորհանդեսը
ՍՏԵՓԱՆԱԿԵՐՏ, 30 սեպտեմբերի, ԱՐՑԱԽՊՐԵՍ։ Նանար Սիմոնյանը «Արցախպրես»-ի թղթակցի հետ զրույցում նշեց, որ գրքի շնորհանդեսը պիտի կայանար իր և Կարապենցի նախնիների հայրենի բերդաքաղաքում՝ Շուշիում։
«Ցավով ու սրտի անասելի կսկիծով եմ արձանագրում, որ հայտնի պատճառներով, մենք այսօր զրկված ենք այդ հնարավորությունից։ Բայց ես չեմ հուսահատվում, որովհետև Ստեփանակերտի իմ տան պատշգամբից երևացող Շուշին ինձ հուշում է, որ արդարությունն, ի վերջո, հաղթելու է, և աշխարհի ամենալուսավոր ու ամենահայաշունչ քաղաքը նորից ազատագրվելու է գերության կապանքներից։ Ես հավատում եմ, ներքին ձայնս հուշում է, որ մենք Շուշիի Ղազանչեցոց եկեղեցում մեր աղոթքն առ Աստված հղելու և Շուշիում գրքերի շնորհանդեսներ կազմակերպելու հնարավորություն դեռ ունենալու ենք», - ասաց Ն. Սիմոնյանը։
«Հակոբ Կարապենցի ստեղծագործությունը» գիրքը տպագրվել է «Համազգային հայ կրթական և մշակութային միության» Արցախի գրասենյակի նախաձեռնությամբ և «Համազգային»-ի կենտրոնական վարչության մեկենասությամբ։
«Գիրքն ընթերցողի սեղանին է հայտնվել «Համազգային հայ կրթական և մշակութային միության» Արցախի գրասենյակի տնօրեն Հերմինե Ավագյանի հետևողականության, նվիրվածության ու անշահախնդրության արդյունքում։ Շնորհակալ եմ «Համազգային»-ի մեծ ընտանիքին այս դժվար օրերին Արցախի կողքին կանգնելու և Արցախում ապրող ու ստեղծագործող անհատներին սատարելու համար», - նշեց Ն. Սիմոնյանը։
«Համազգային հայ կրթական և մշակութային միության» Արցախի գրասենյակի տնօրեն Հերմինե Ավագյանի խոսքով՝ գիրքը սփյուռքահայ ականավոր գրող Հակոբ Կարապենցի ստեղծագործությունների գրականագիտական և փիլիսոփայական վերլուծությունն է ներկայացնում, ինչը կարևոր աշխատանք է սփյուռքահայ գրական անդաստանը ուսումնասիրողների, ուսանողների և, առհասարակ, գիր ու գրականություն սիրողների համար։
«Կարապենցն այն գրողներից է, ով դեռևս ըստ արժանվույն չի ներկայացվել մեր ընթերցողներին։ Նրա գրական ժառանգությունը տարբերվող ու յուրատիպ խոսք է մեր ընթերցողներին, որին պետք է անպայման ծանոթանալ։ «Համազգային»֊ի կենտրոնական վարչությունը բարձր է գնահատել արցախցի երիտասարդ գրականագետի աշխատանքը և հրապարակել այն։ Գիրքը տարածում ենք նաև Սփյուռքում՝ մեր կառույցների միջոցով», - նշեց Հ.Ավագյանը։