«Դասավանդի՛ր, Հայաստան» ծրագրի շրջանակներում անգլերենի ուսուցչուհի Սոնա Գևորգյանը Երևանից գործուղվել է Արցախ: Նա դասավանդում է ԱՀ Մարտակերտի շրջանի Վանք համայնքի Գ. Հայրապետյանի անվան միջնակարգ դպրոցում:
Արցախում միշտ երջանիկ եմ եղել և աշխատանքս կատարել եմ սիրով. «Դասավանդի՛ր, Հայաստան»֊ի՝ Արցախ գործուղված ուսուցչուհի
ՍՏԵՓԱՆԱԿԵՐՏ, 22 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Սոնա Գևորգյանը նշեց, որ, «Դասավանդի՛ր, Հայաստան» կազմակերպության կողմից առաջարկվող երկամյա առաջնորդության զարգացման ծրագրի ուսուցիչներից մեկը լինելով, որոշել է Արցախ տեղափոխվել, քանի որ ուզում էր ապրել այստեղ։ «Երկու տարի դասավանդել եմ Շուշիի շրջանի Բերդաձորի ենթաշրջանի Հին շեն գյուղում։ Հին շենի միջոցով եմ ճանաչել Արցախը։
Ընթացքում հասկացա, որ կուզենայի շարունակել երեխաների հետ աշխատանքս՝ այս անգամ արդեն Վանքում, որը հնարավորություն կտար ապրել Գանձասարին մոտ, աշխատել որպես մանկավարժ և շարունակել կյանքն Արցախում», - նշեց Ս. Գևորգյանը։
Մեր զրուցակցի խոսքով՝ Արցախում միշտ երջանիկ է եղել, ամենօրյա աշխատանքը կատարել է սիրով՝ հուսալով և հավատալով, որ Արցախն է մեր ապագան՝ իր անվերջ տոկունությամբ և պայքարելու ամուր կամքով։
Անգլերենի ուսուցչուհին հավելեց նաև. «Նորարար մոտեցումներն ու դասավանդման բազմաբնույթ մեթոդները շատ են, այնուամենայնիվ, կարող եմ ասել, որ նախ՝ հնարավորինս փորձում եմ ճանաչել երեխաներին՝ իրենց կարծիքները լսելով, և, մասնագիտական գիտելիքներս ու փորձառությունս համադրելով, գիտելիքը աշակերտների համար դարձնել հասանելի և ընկալելի, և, ամենակարևորը, կիրառելի կյանքում»: