Սեպտեմբերի 16-17-ը Ստեփանակերտի Կամավոր ֆիզկուլտուրային մարզական կենտրոնի մարզադահլիճում կազմակերպվել են ֆիզկուլտուրնիկի օրվան նվիրված սեղանի թենիսի մրցումներ:
Ֆիզկուլտուրնիկի օրվան նվիրված՝ սեղանի թենիսի մրցումներ անցկացվեցին
ՍՏԵՓԱՆԱԿԵՐՏ, 17 սեպտեմբերի, ԱՐՑԱԽՊՐԵՍ: ԱՀ սեղանի թենիսի ֆեդերացիայի նախագահ, մրցումների պատասխանատու Գրիգոր Առաքելյանը ողջունելի է համարում օրվա կապակցությամբ կազմակերպված մասսայական միջոցառումները:
«Մրցումներին մասնակցում են Ստեփանակերտի Կամավոր ֆիզկուլտուրային մարզական կենտրոնի և քաղաքապետարանի սպորտդպրոցի սաները՝ 16 տղա և 6 աղջիկ: Տարիքային սահմանափակում չկա: Աղջիկների խմբից առաջին տեղ է զբաղեցրել Անգելինա Մկրտչյանը, երկրորդ տեղ՝ Մարիամ Ամյանը, իսկ երրորդ տեղ՝ Աննա Գրիգորյանը: Տղաների խմբից առաջին հորիզոնականը զբաղեցրել է Վարդան Թովմասյանը, երկրորդ տեղ՝ Արամ Սարգսյանը, իսկ երրորդ տեղ՝ Գոռ Գրիգորյանը: Մրցանակային առաջին, երկրորդ և երրորդ տեղեր զբաղեցրած մասնակիցները արժանացան պատվոգրերի ու դրամական պարգևների», - «Արցախպրես»-ի թղթակցի հետ զրույցում նշեց Գ. Առաքելյանը:
Առաջին մրցանակային տեղը զբաղեցրած Անգելինա Մկրտչյանը ոչ միայն Արցախում է լավ արդյունք գրանցել, այլ նաև Հայաստանում:
«Շատ ուրախ եմ, որ հաղթել եմ, բայց ինձ համար առաջնայինը մասնակցությունն էր, քանի որ հնարավորություն ունեցա ցույց տալու իմ կարողությունները: Բոլոր մասնակիցներին ցանկանում եմ նորանոր հաղթանակներ և շնորհավորում մասնագիտական օրվա կապակցությամբ», - ասաց Ա. Մկրտչյանը: