Ստեփանակերտում կայացել է «Պոլ Էլյուարի տուն ֆրանկոֆոնիայի կենտրոն» հիմնադրամի շենքի բացման հանդիսավոր արարողությունը:
Ֆրանսիական խոսքն ու բարձրաճաշակ մշակույթը հանգրվանեցին Արցախի սրտում. Կայացել է «Պոլ Էլյուարի տուն ֆրանկոֆոնիայի կենտրոն»-ի շենքի բացման արարողությունը
ՍՏԵՓԱՆԱԿԵՐՏ, 16 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ միջոցառումը մեկնարկել է դրոշների բարձրացման արարողությամբ:
Արցախի Հանրապետության պետական դրոշի բարձրացման պատիվը տրվել է ԱՀ ԿԳՄՍ նախարար Լուսինե Ղարախանյանին, Ֆրանսիայի դրոշինը՝ «Ֆրանսիա-Արցախ բարեկամության շրջանակ»֊ի նախագահ, Ֆրանսիայի Ազգային ժողովի պատգամավոր Ֆրանսուա Պուպոնիին, իսկ Ֆրանկոֆոնիայի դրոշինը՝ «Ֆրանկոֆոնիան Արցախում» միության նախագահ, ԱԺ նախկին պատգամավոր Ֆրանսուա Ռոշբլուանին:
«Արդեն մեկ տարուց ավելի է, ինչ շատ թանկ շփումներ են հաստատվել բարձր արժեքներ կրող մի խումբ ֆրանսիացիների հետ, որով, ըստ էության, ես զգում եմ Ֆրանսիան և նրա մշակույթը։ Արցախյան 44-օրյա պատերազմից հետո այդ հարաբերությունները որակական նոր փուլ են մտել, ինչի արդյունքում ֆրանկոֆոնիայի կենտրոնի գործունեությունը կյանքի կոչվեց, և ֆրանսիական խոսքն ու բարձրաճաշակ մշակույթը հանգրվանեցին Արցախի սրտում։ Ինչու՞ Պոլ Էլյուար։ Որովհետև նա զենք ու գրիչ կրող, անարդարությունների, ատելության, պատերազմի, սարսափի դեմ պայքարող ոգի է։ Նա ազատության խորհրդանիշ է։ Ես տպավորված եմ ֆրանսիական ժողովրդի՝ հայերիս նկատմամբ արտահայտած ապրումակցման՝ էմպատիայի զգացման խորությամբ»,- մեզ հետ զրույցում նշեց Լ.Ղարախանյանը։
«Պոլ Էլյուարի տուն ֆրանկոֆոնիայի կենտրոն» հիմնադրամի տնօրեն Ժերար Գերգերյանը տեղեկացրեց, որ կենտրոնում շաբաթական առնվազն 3 միջոցառում է կազմակերպվելու։
«Երկար ժամանակ է, ինչ փորձում եմ հասկանալ այս ժողովրդի՝ հողին այսչափ կապված լինելու իմաստը, երկրին այսչափ կառչելու հաստատակամությունը։ Եվ հասկացա, որ իրականում էականը կապվածությունն է. պետք է հիշել կապը նախնիների հետ։ Մենք պետք է ֆրանկոֆոնիայի կենտրոնը դարձնենք շարունակական փոխանակումների մի հարթակ, որը բաց կլինի բոլոր մշակույթների համար, ինչպես նաև ամրապնդենք մշակութային համերաշխությունը»-ասաց Ժ. Գերգերյանը։
Միջոցառման վերջում կենտրոնի տարածքում կազմակերպվեցին ծառատունկ ու խորհրդանշական հյուրասիրություն։
Բացման արարողությանը ներկա էին ԱՀ առաջին տիկին Քրիստինե Հարությունյանը, ԱՀ պետական նախարար Արտակ Բեգլարյանը, պաշտոնատար այլ անձինք, «Ֆրանսիա-Արցախ բարեկամության շրջանակ»֊ի անդամներ: