Սանկտ Պետերբուրգում նախօրեին առաջին անգամ անցկացվեց FIAS president cup (Սամբոյի միջազգային ֆեդերացիայի նախագահի գավաթ) միջազգային մրցաշարը, որտեղ արցախցիներ Դավիթ Գրիգորյանը և Արման Ավանեսյանը արժանացան բրոնզե մեդալների:
Արցախցիները միջազգային մրցաշարում մեդալներ են նվաճել
ՍՏԵՓԱՆԱԿԵՐՏ, օգոստոսի 23, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում նշեց ԱՀ ԿԳՄՍ նախարարության աշխատակազմի սպորտի վարչության պետ Դանիել Մկրտչյանը: «Միջազգային մրցաշարին մասնակցեցին բարձր վարկանիշ ունեցող, Սամբոյի աշխարհի ու մայրցամաքների առաջնությունների, Աշխարհի գավաթի հաղթող և մրցանակակիր հանդիսացող ուժեղագույն մարզիկները:
Մարզական միջոցառմանը պատվիրակություններ էին գործուղել ԱՄՆ-ն, Ֆրանսիան, Բուլղարիան, Կամերունը, Հայաստանը, Հունաստանը, Ղազախստանը, Ղրղզստանը, Մարոկկոն, Մոլդովան, Ռուսաստանը, Բելոռուսը, Սերբիան, Վենեսուելան, Վրաստանը, Տաջիկստանը, Ուզբեկստանը: Հայաստանը ներկայացնող 4 մարզիկներից 3-ը՝ արցախցիներ Դավիթ Գրիգորյանը՝ 88կգ և Արման Ավանեսյանը՝ 98կգ, գյումրեցի Գրիգոր Մխիթարյանը՝ 64կգ քաշային կարգերում, արժանացան բրոնզե մեդալների: Գավաթին մասնակցել է նաև ԱՀ և ՀՀ սամբոյի վաստակավոր մարզիչ, միջազգային կարգի մրցավար Ազատ Անդրյանը», - նշեց Դ. Մկրտչյանը: