Այսօր՝ հուլիսի 23-ին, Ստեփանակերտում դիմավորեցին խառը մենամարտերի հայտնի հայ մարզիկներին:
Ստեփանակերտում դիմավորեցին խառը մենամարտերի(MMA) հայտնի հայ մարզիկներին
ՍՏԵՓԱՆԱԿԵՐՏ, հուլիսի 23, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ նրանք հուլիսի 23-28-ը Արցախում կանցկացնեն ուսումնամարզական հավաքներ, ինչպես նաև մարզումներ Արցախի MMA հավաքականի մարզիկների հետ, հանդիպումներ, վարպետության դասեր երիտասարդների համար:
Խառը մենամարտերում (ММА) հանդես եկող մարզիկ Էդուարդ Վարդանյանի համար մեծ պատիվ է գտնվել Արցախում:
«Մենք եկել ենք արցախցի մարզիկներին աջակցելու: Կարծում եմ՝ սա շատ լավ առիթ կլինի ծանոթանալու համար: Մենք կկիսվենք նրանց հետ մեր փորձով , և հույս ունեմ, որ միասին հետաքրքիր ժամանակ կանցկացնենք։ Իսկ հետագայում նրանք կօգտագործեն այն, ինչ կտեսնեն ուսումնամարզական հավաքներին այս օրերի ընթացքում»,- մեզ հետ զրույցում ասաց Է. Վարդանյանը:
Արցախի խառը մենամարտերի (MMA) ֆեդերացիայի նախագահ Գարեգին Աղաբալյանի խոսքով՝ այսօր Արցախ ժամանեցին աշխարհի տարբեր մասերից՝ Ամերիկայից, Ուկրաինայից, Ռուսաստանի տարբեր քաղաքներից հիմնականում «Львиное Сердце» մարտական ակումբի տղաները:
«Մարզիկներն Արցախում կանցկացնեն հնգօրյա ուսումնամարզական հավաքներ: Նպատակն է ոգևորել մարզիկներին, բարձրացնել մարզիկների բարոյահոգեբանական և տեխնիկատակտիկական մակարդակը: Մնացած աշխարհահռչակ մարզիիկներն էլ, ոգևորվելով տղաների օրինակից, հետևեն նրանց՝ գալով Արցախ», - նշեց Գարեգին Աղաբալյանը:
Մեր զրուցակցի հաղորդմամբ՝ Արցախում են մարզիկներ Արմեն Ղուլյանը, Հրաչիկ Բոզինյանը, Ժորա Այվազյանը, Մորիս Բոլեյանը, Վարշամ Գևորգյանը, Տարոն Գրիգորյանը, Նազար Արզումանյանը, Կարեն Փասիկյանը, Վարդան Բաբայանը, Վահե Սահակյանը, Էդուարդ Վարդանյանը, Վազգեն Ղազարյանը և Սահակ Պետրոսյանը: