Հուլիսի 20-22-ը ԱՀ ուշու քունգ ֆուի ֆեդերացիայի մարզադահլիճում տեղի են ունեցել վարպետության դասեր։
Ստեփանակերտում «ուշու քունգ ֆու» մարզաձևի վարպետության դասեր են կազմակերպվել
ՍՏԵՓԱՆԱԿԵՐՏ, 22 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ վարպետության դասը վարում էր Լիտվայից կամավոր հիմունքներով Արցախ ժամանած աշխարհի ուշու քունգ ֆուի չեմպիոն Արամ Մուրադյանը:
«Ես աշխատում եմ Լիտվայի հանրապետությունում, այնտեղ ունեմ խմբեր, որոնց մարզում եմ: Ժամանակավոր այցով եկել եմ Հայաստան և այդ ժամանակ իմացա, որ կազմվում է Հայաստանի ուշուի մանկապատանեկան հավաքական: Որոշեցի գալ Արցախ՝ ընդհանուր պարապմունքներ կազմակերպելու նպատակով, որպեսզի պատվով հանդես գանք միջազգային մրցաշարերում, զարգացնենք ուշու մարզաձևն Արցախում, որն այսօրվա դրությամբ շատ քիչ տարածվածություն ունի»,- նշել է Ա. Մուրադյանը:
Խոսելով Արցախի ուշուի ֆեդերացիայի սաների ներուժի մասին՝ մարզիկը նրանց պատրաստվածությունը բավարար գնահատեց:
«Երեխաները փորձում են լավ տիրապետել այս մարզաձևին, կանոնավոր կերպով մասնակցում են պարապմունքներին: Հաջողության հասնելու համար պետք է քրտնաջան աշխատել, պարապմունքների թիվը շատացնել, հաճախակի դարձնել: Մենք՝ հայերս, տաղանդավոր ազգ ենք և կարող ենք մեծ բարձունքների հասնել»,- ընդգծել է մեր զրուցակիցը: Ստեփանակերտի ուշուի մարզադպրոցի տարիքով ամենափոքրը Մանե Խաչատրյանն է՝ 5 տարեկան, ով արդեն 1 տարի է՝ հաճույքով ու սիրով հաճախում է պարապունքների: «Այս 1 տարվա ընթացքում ես սովորել եմ տարբեր վարժություններ: Ամեն անգամ հաճույքով եմ գալիս և մարզվում: Ուզում եմ այս մարզաձևում մեծ հաջողությունների հասնել»,- նշել է Մ. Խաչատրյանը: