Ստեփանակերտի մանկապատանեկան ստեղծագործական կենտրոնում (ՄՊՍԿ) այսօր՝ ապրիլի 9-ին, կազմակերպվել է «Խաղաղությունը և խաղաղապահները երեխաների աչքերով» խորագիրը կրող ցուցահանդես:
Մայրաքաղաքում կազմակերպվել է «Խաղաղությունը և խաղաղապահները երեխաների աչքերով» խորագիրը կրող ցուցահանդես
ՍՏԵՓԱՆԱԿԵՐՏ, 9 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ՄՊՍ կենտրոնի հոգաբարձուների խորհրդի նախագահ Լյուդմիլա Բարսեղյանը: Իր խոսքում կարևորելով արվեստի դերը՝ Լ. Բարսեղյանը նշել է, որ իրենք փորձել են ցուցահանդեսի միջոցով հասկանալ երեխաների պատկերացումները խաղաղության և խաղաղապահների մասին՝ պատերազմից հետո:
Միջոցառմանը ներկա ԱՀ կրթության, գիտության, մշակույթի և սպորտի նախարար Լուսինե Ղարախանյանն իր խոսքում ընդգծել է, որ արվեստի լեզուն ամենախիզախն ու գեղեցիկն է:
«Արվեստի միջոցով կարող ենք հատել բոլոր սահմանները: Նկարների մեծ մասում արտացոլված են խաղաղապահները: Մենք երազում ենք, որ գա ժամանակ և մենք կարողանանք ինքներս մեզ պաշտպանել մեր հայրենիքի սահմաններում: Համոզված եմ, որ երեխաների ստեղծագործական կարողություններով ոչ միայն հոգեկան աշխարհն է գեղեցկանում, այլ նաև տեսանելի, ազդեցիկ և գնահատելի կարող են դառնալ համաշխարհային մշակույթում։ Շնորհակալ եմ մանկավարժներին, որովհետև դաժան պատերազմից հետո նրանց հաջողվել է հասնել այսպիսի հաջողությունների»,- մասնավորապես ավելացրել է նախարարը:
Ցուցահանդեսին մասնակից Աննա Ջամալյանը, ով արժանացել է երկրորդ մրցանակային տեղին, մեզ հետ զրույցում ներկայացրել է իր նկարը՝ ասելով. «Իմ նկարը խորհրդանշում է հայ ժողովրդի պատմությունը: Ես ցանականում եմ, որ ողջ աշխարհը իմանա հայերի մասին , և մենք չկորցնենք մեր ազգային արժեքները»:
Ցուցահանդեսի վերջում նախապես ընտրված ժյուրիի կազմն ընտրել է լավագույն նկարները. Հաղթող ճանաչված 9 սաներ պարգևատրվել են պատվոգրերով և նվերներով: Ժյուրիի հանձնախմբի նախագահ Յուրի Հովհաննիսյանն իր խոսքում բարձր է գնահատել կազմակերպված ցուցահանդեսը:
Նա նշել է, որ ներկայացված նկարներից դժվար էր ընտրել լավագույնները, որովհետև բոլորն էլ յուրովի մեծ բովանդակություն էին պարունակում:
Միջոցառմանը մասնակցում էին ԱՀ ԿԳՄՍ նախարարության, Ստեփանակերտի քաղաքապետարանի ներկայացուցիչներ, ռուս խաղաղապահներ: