Արցախի պետական պաշտոնյաների ծառայողական ավտոմեքենաների թվի կրճատման վերաբերյալ քննարկումներ են եղել և կա Հանրապետության նախագահի որոշումը՝ դրանք աճուրդի դնելու վերաբերյալ :
Արցախի պետական ծառայողական թանկարժեք մեքենաները բաց աճուրդի կդրվեն. Արտակ Բեգլարյան
ՍՏԵՓԱՆԱԿԵՐՏ, 15 հունվարի, ԱՐՑԱԽՊՐԵՍ: «Արցախպրես»-ի հաղորդմամբ՝ այս մասին ասել է Արցախի Հանրապետության նախագահի աշխատակազմի ղեկավար Արտակ Բեգլարյանը՝ առցանց բաց զրույցի ժամանակ պատասխանելով ֆեսյբուքյան օգտատիրոջ հարցին:
«Որոշում է ընդունվել, որ հատկապես թանկարժեք ծառայողական ավտոմեքենաները՝ բաց աճուրդի են դրվելու, որպեսզի դրանք հնարավորինս բարձր գնով վաճառվեն, ապա՝ գումարներն ուղղվեն պետական բյուջե՝ ըստ կարիքի հանրային նպատակներով օգտագործելու համար: Թեև ես այն պաշտոնյաների թվին եմ դասվում, որն ունի ծառայողական ավտոմեքենայի կարիք, սակայն անձամբ դիմելու եմ նախագահին, որպեսզի ինձ սպասարկող մեքենան նույնպես աճուրդի դրվի: Անձամբ ինձ համար մեքենան փոխադրամիջոց է , և ոչ՝ ինքնահաստատման կամ սոցիալական դիրքր ցույց տալու միջոց: Պետական ծառայողական մեքենան պետք է կիրառվի բացառապես ծառայողական նպատակներով: Դեռևս Մարդու իրավունքների պաշտպանի պաշտոնում՝ ունենալով ծառայողական մեքենա, շատ անգամ չեմ օգտվել: Փոխարենն օգտագործել եմ եղբորս, ընկերոջ կամ գործընկերոջ մեքենան կամ օգտվել տաքսի ծառայությունից: Մարդու իրավունքերի պաշտպանին հատկացված ծառայողական մեքենան էլ, եթե օգտագործել ենք, ապա՝ և իմ համար, և աշխատակազմի: Ընդհուպ՝ առաջին կարգի մասնագետն օգտվել է այդ ավտոմեքենայից: Իմ կարծիքով, սա պետական համակարգում հանրային միջոցների հանդեպ վերաբերմունքի ամենաճիշտ մոդելն է: Պետական միջոցների օգտագործման վերաբերյալ մեր՝ այդ թվում պետական պաշտոնյաների մի զգալի հատվածի մոտ, հոգեկերտվածքային մեծ խնդիր ունենք. պետական,հանրային միջոցները՝ պատշաճ, սրտացավ վերաբերմունքի չեն արժանանում: Կարծում եմ դա գալիս է խորհրդային տարիներից, և միգուցե ավելի վաղ ժամանակներից, քանի որ, երկար դարեր չունենալով պետականություն՝ մեզանում ձևավորվել է վատ մտածողություն,որ պետական ունեցվածքը մերը չէ և ինչպես ուզում ենք կարող ենք վարվել»,-ասել է ԱՀ նախագահի աշխատակազմի ղեկավարը՝ հավելելով, որ անձամբ՝ հարկ եղած դեպքում, օգտվելու է աշխատակազմում առկա մյուս ավտոմեքենաներից, ինչը կարող են անել նաև մյուսները:
