Հետախուզական տվյալների համաձայն՝ այս օրերի ընթացքում առաջնագծի տարբեր ուղղություններում Ադրբեջանի զոհերի մեծ մասը եղել են Ադրբեջանում ապրող ազգային փոքրամասնությունների ներկայացուցիչներ:
Հակառակորդի զոհերի մեծ մասը եղել են Ադրբեջանում ապրող ազգային փոքրամասնությունների ներկայացուցիչներ. Վահրամ Պողոսյան
ՍՏԵՓԱՆԱԿԵՐՏ, 1 հոկտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին քիչ առաջ «Արցախ/Տեղեկատվական շտաբ»-ում կայացած ճեպազրույցի ժամանակ ասել է ԱՀ Նախագահի աշխատակազմի տեղեկատվության գլխավոր վարչության պետ Վահրամ Պողոսյանը:
Նրա խոսքով՝ միայն մի ուղղությամբ 148 ազգությամբ լյազգի զինվոր է զոհվել: Մի քանի հարյուր զոհեր կան ազգությամբ թալիշ զինվորների շրջանում, ինչը, ըստ ստացված հետախուզության տվյալների, լուրջ դժգոհություն է առաջացրել Ադրբեջանում ապրող ազգային փոքրամասնությունների մոտ:
«Առաջիկայում մենք հավանաբար ականատեսը կլինենք այդ ազգերի ներկայացուցիչների բողոքի ակցիային, քանի որ իրականում այս փաստերը ևս մեկ անգամ վկայում են, որ Ադրբեջանը նման սադրիչ գործողություններն օգտագործում է նաև իր երկրում ապրող ազգային փոքրամասնությունների նկատմամբ նման վարքագիծ դրսևորելու համար»,- ավելացրել է Վ. Պողոսյանը:
ԱՀ Նախագահի մամուլի խոսնակը նշել է, որ ժամանակին նման քաղաքականություն իրականացվել է արցախահայության նկատմամբ, մասնավորապես՝ խորհրդային ժամանակահատվածում, երբ Արցախը գտնվում էր Ադրբեջանի կազմում:
