Միջազգային հանրությունը պետք է հակազդի ԱՄՆ-ի կողմից Իրանի դեմ պատժամիջոցների վերականգնմանը, նշված է Չինաստանի ԱԳՆ պաշտոնական ներկայացուցիչ Հուա Չունյինի հայտարարության մեջ՝ նվիրված իրանական միջուկային խնդրի վերաբերյալ Համատեղ համապարփակ գործողությունների ծրագրի ստորագրման տարելիցին։
Չինաստանը կոչ է արել հակազդել Իրանի դեմ ԱՄՆ պատժամիջոցներին
ՍՏԵՓԱՆԱԿԵՐՏ, 14 հուլիսի, ԱՐՑԱԽՊՐԵՍ: Այս մասին հայտնում է News.am-ը։
Հինգ տարի առաջ Իրանը եւ միջազգային միջնորդների «վեցյակը» իրանական ատոմի խնդրի կարգավորման համաձայնության հասան: Գործարքը, սակայն, նախնական տեսքով չգոյատեւեց անգամ 3 տարի. 2018 թվականի մայիսին ԱՄՆ-ն հայտարարեց համաձայնագրից միակողմանի կարգով դուրս գալու եւ Թեհրանի դեմ խիստ պատժամիջոցները վերականգնելու մասին:
«Միջազգային հանրությունը պետք է միասին հանդես գա Իրանի դեմ պատժամիջոցների երկարաձգման կամ վերականգնման դեմ, պնդի, որ ԱՄՆ-ն վերադառնա ՀՀԳԾ-ն հարգելու եւ կատարելու ուղուն»,- հայտարարել է Հուա Չունյինը:
Նա ափսոսանք է հայտնել այն կապակցությամբ, որ ԱՄՆ-ն վերջին տարիներին վարում է միակողմանի գործողությունների քաղաքականություն, հեռանում իր միջազգային պարտավորություններից եւ դուրս գալիս միջազգային պայմանագրերից:
«2018 թվականի մայիսին ԱՄՆ-ն դուրս եկավ ՀՀԳԾ-ից, դրանից բացի, սկսեց ամբողջ ուժով խոչընդոտել համաձայնագրի մյուս անդամների կողմից այն կատարելուն, ինչը հանգեցրեց Իրանի միջուկային հարցի շուրջ լարվածության մեծացման»,- հավելել է Հուա Չունյինը:
Չինաստանի արտաքին քաղաքականության գերատեսչության ներկայացուցիչը նշել է, որ ամերիկյան կողմը ներկայումս ամբողջ ուժով փորձում է Անվտանգության խորհրդում առաջ մղել զենքի մատակարարման էմբարգոյի երկարաձգումը եւ «սպառնում է վերադարձնել Իրանի դեմ ՄԱԿ ԱԽ վերականգնվող պատժամիջոցները՝ փորձելով հետագայում եւս խափանել համաձայնագիրը»:
Նա հավելել է, որ գործարքով ստանձնած պարտավորությունների մի մասի կատարումից Իրանի հրաժարվելը ԱՄՆ-ի կողմից առավելագույն ճնշման հետեւանքն է:
«Չինական կողմի կարծիքով՝ ՀՀԳԾ պաշտպանությունն ու կատարումը իրանական միջուկային խնդրի խաղաղ լուծման միակ ճիշտ ճանապարհն է»,- ամփոփել է Հուա Չունյինը:
