2020 թվականի հունվար-հունիս ամիսներին ԱՀ արտակարգ իրավիճակների պետական ծառայության ճգնաժամային կառավարման կենտրոնն (911) ընդհանուր առմամբ ստացել է 23 հազար 627 զանգ, այդ թվում՝ 2868-ը տարբեր պատահարների վերաբերյալ:
Հունվար-հունիս ամիսներին ճգնաժամային կառավարման կենտրոնում գրանցվել է 23 հազար 627 զանգ
ՍՏԵՓԱՆԱԿԵՐՏ, 14 հուլիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ արտակարգ իրավիճակների պետական ծառայության քաղաքացիական պաշտպանության և աղետների հետևանքների վերացման շտաբի օպերատիվ կառաման բաժնի պետ Դավիթ Աբաղյանը՝ նշելով, որ նախորդ տարվա նույն ժամանակահատվածի համեմատ զանգերի թիվն աճել է. պատահարների հետևանքով զոհերի թիվը՝ նվազել:
Նրա խոսքով՝ ընթացիկ տարվա հունվար-հունիս ամիսներին գրանցվել է 10 զոհ, տուժել՝ 40 քաղաքացի։
«Նախորդ տարվա նույն ժամանակահատվածում գրանցվել էր 15 հազար 699 զանգ, որից 2941-ը՝ արտակարգ պատարների ու դեպքերի վերաբերյալ: Ի դեպ, նախորդ տարվա առաջին կիսամյակում գրանցվել էր 15 զոհ և 102 տուժած։ Զոհերի հիմնական պատճառը ճանապարհատրանսպորտային պատահարներն են եղել։ Նախորդ և ընթացիկ տարում գրանցված զանգերի գերակշիռ մասը կենցաղային բնույթի են»,-մասնավորապես ասել է Դ. Աբաղյանը։
