Հուլիսի 7-ի դրությամբ հանրապետությունում հնձվել է 55 հազար 211 հա ցանքատարածք, որից 18 հազար 816 հա-ը՝ ցորենի և 36 հազար 995 հա-ը՝ գարու:
Հանրապետությունում հնձվել է 55 հազար 211 հա ցանքատարածք. Հադրութի շրջանում գրանցվել է բարձր ցուցանիշ
ՍՏԵՓԱՆԱԿԵՐՏ, 7 հուլիսի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է ԱՀ գյուղատնտեսության փոխնախարար Վիլեն Ավետիսյանը:
Նա նշել է, որ համախառը բերքը կազմել է 70 հազար 200 տ, այդ թվում՝ 26 հազար 809,5 տ ցորեն և 43 հազար 990,5 տ գարի: Միջին բերքատվությունը հա-ից կազմել է 12,7 ց:
Խոսելով ցուցանիշների մասին՝ մեր զրուցակիցը տեղեկացրել է, որ ուսումնասիրությունների արդյունքում բարձր ցուցանիշներ գրանցվել են Հադրութի շրջանում:
«Կան նաև այլ շրջանններ, որտեղ առանձին ցանքատարածքներից ստացած արդյունքները գոհացուցիչ են: Ցածր ցուցանիշներ ունենալու պատճառը մայիսի երկրորդ կեսին տեղումների պակասն էր, որի արդյունքում էլ չենք ստացել ոչ նորմալ և հասուն հատիկներ: Սպասելիքներն ավելի շատ էին, քան ունենք այսօր: Ցանքատարածքներում աշխատում է 177 կոմբայն, որը բավարարում է աշխատանքի ընթացքը: Ի ուրախություն բոլորիս, այս տարի չենք ունեցել խոշոր ցանքատարածքների հրդեհման դեպքեր. սկզբնական շրջանում անուշադրության հետևանքով հրդեհվել են փոքր տարածքներ,բայց, ներկայումս, ընդհանուր իրավիճակը վերահսկելի է համապատասխան գերատեսչությունների կողմից»,- մասնավորապես ասել է Վ. Ավետիսյանը:
