Արցախի Հանրապետության Նախագահ Արայիկ Հարությունյանն այսօր ֆեյսբուքյան ուղիղ եթերի ընթացքում անդրադարձել է կադրային վերջին նշանակումներին:
Պետությունից վճարվող ցանկացած քաղաքացի պետք է հաշվետվություն տա ոչ միայն իշխանությանը, այլև հանրությանը. Արայիկ Հարությունյան
ՍՏԵՓԱՆԱԿԵՐՏ, 2 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ իր խոսքում Արայիկ Հարությունյանն ասել է, որ որոշ սուբյեկտիվ պատճառներով հաճախ թիրախավորվում են պատասխանատվություն ստանձնած քաղաքացիները: Նա հորդորել է ժամանակ և հնարավորություն տալ աշխատելու:
«Ոչ մեկի մեջ թշնամի մի փնտրեք: Իրենց սխալներով ու հաջողություններով բոլորն էլ ունեն անցած ուղի: Եթե քննադատում եք, դա արեք կատարած աշխատանքի համար: Ինչ վերաբերում է իմ խորհրդականների ու օգնականների նշանակմանը, նշեմ, որ ես ինքս եմ ընտրում՝ ով կարող է ինձ օգնել և խորհուրդ տալ: Եվ նրանք, ովքեր նշանակվեն ու չաշխատեն, ազատվելու են աշխատանքից, քանի որ պետությունից վճարվող ցանկացած քաղաքացի պետք է հաշվետվություն տա իր աշխատանքի համար ոչ միայն իշխանությանը, այլև հանրությանը»,- ավելացրել է Ա. Հարությունյանը:
Նախագահը հայտնել է, որ բոլոր խորհրդականները և լիազոր ներկայացուցիչներն ունենալու են կոնկրետ գործառույթ և իրենց լիազորությունների շրջանակներում աշխատելու հնարավորություն՝ վերահսկելու ոչ միայն կառավարության գործունեությունը, այլև ուշադրության կենտրոնում պահելու քաղաքացիների խնդիրները:
Ա. Հարությունյանը նշել է, որ մի շարք խորհրդականներ աշխատելու են հասարակական հիմունքներով: Նա տեղեկացրել է, որ կադրային նշանակումները լրիվությամբ ավարտված չեն:
Հանրապետության Նախագահը կրկին պատրաստակամություն է հայտնել համագործակցելու բոլորի հետ՝ հնարավորություն տալով ճակատագրական փուլում մասնակիցը դառնալու հավակնոտ ծրագրի:
