ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ: Նման կանխատեսում է ներկայացվել ՄԱԿ-ի Առևտրի և զարգացման հարցերով խորհրդաժողովի զեկույցում, որը հրապարակվել է հուլիսի 1-ին, փոխանցում է tert.am-ը:

Ընդգծվում է, որ «միջազգային զբոսաշրջության հատվածը, կորոնավիրուսի համավարակով պայմանավորված գրեթե 4 ամիս տևած լճացման պատճառով, կարող է առնվազն 1.2 տրիլիոն դոլար կորցնել, ինչը կազմում է համաշխարհային ՀՆԱ-ի 1.5 տոկոսը»: Փորձագետների գնահատմամբ՝ այդ կորուստները կհասնեն մինչև 2.2 տրիլիոն դոլարի, եթե ճգնաժամը շարունակվի 8 ամիս:

«Խորհրդաժողովի կարծիքով՝ վատատեսական սցենարի համաձայն՝ միջազգային զբոսաշրջության 12-ամսյա խախտումը կհանգեցնի 3.3 տրիլիոն դոլարի կորստի, որը կազմում է համաշխարհային ՀՆԱ-ի 4.2 տոկոսը»,- եզրակացնում են զեկույցի հեղինակները:

Կառույցից հիշեցնում են, որ զբոսաշրջությունը «տնտեսության ողնաշարն է բազմաթիվ երկրների համար և ապրուստի աղբյուր միլիոնավոր մարդկանց համար ողջ աշխարհում»: Մեկուսացման միջոցառումները, ուղևորությունների սահմանափակումները և բնակչության եկամտի անկումը դանդաղեցնում են այդ հատվածի վերականգնումը:

Զեկույցի համաձայն՝ զբոսաշրջության ոլորտի անկման պատճառով հատկապես մեծ կորուստներ են կրում զարգացող երկրները: Թաիլանդի կորուստը գնահատվում է ՀՆԱ-ի 11 տոկոսի չափով, Ճամայկայինը՝ 9 տոկոսի, Քենիայի, Եգիպտոսի և Մալայզիայի դեպքում՝ մինչև 3 տոկոսի: