Իրանի նախագահ Հասան Ռոհանին հայտարարել է, որ Թեհրանը Վաշինգտոնի հետ բանակցությունների կգնա միայն միջուկային գործարքի շրջանակում և վերջինիս կողմից հասցված վնասի փոխհատուցման դեպքում:
Իրանը բանակցությունների կգնա ԱՄՆ-ի հետ միայն միջուկային համաձայնագրի շրջանակում և վերջինիս կողմից վնասի փոխհատուցման դեպքում. Ռոհանի
ՍՏԵՓԱՆԱԿԵՐՏ, 24 հունիսի, ԱՐՑԱԽՊՐԵՍ։ Այս մասին հայտնում է Tert.am-ը:
«Մենք միշտ պատրաստ ենք (բանակցությունների), բայց միայն այն բանից հետո, երբ ԱՄՆ-ն հայտարարի, որ վերադառնում է (միջազգային) իրավունքի կատարմանը, ՄԱԿ-ի բանաձևերի դրույթների և Գործողությունների համատեղ համապարփակ ծրագրով ստանձնած պարտավորությունների կատարմանը, վերադառնում է «վեցնյակ»,-ասել է Ռոհանին:
«Մեր դիրքորոշումը պարզ է, նրանք պետք է ենթարկվեն իրավունքին, ներողություն խնդրեն և վճարի տեսքով փոխհատուցեն այն վնասը, որ հասցրել են Իրանին»,-հայտարարել է նախագահը:
Ավելի վաղ Ռոհանին հայտարարել էր, որ ամերիկյան պատժամիջոցների պատճառով Իրանը կորցրել է շուրջ 50 միլիարդ դոլար:
Հիշեցնենք, որ 2015 թվականին Իրանն ու միջազգային «միջնորդ վեցյակը»՝ Ռուսաստան, ԱՄՆ, Մեծ Բրիտանիա, Չինաստան, Ֆրանսիա, Գերմանիա, հասել էին իրանական միջուկային ծրագրի շուրջ պատմական համաձայնության: Ընդունվել էր Գործողությունների համատեղ համապարփակ ծրագիր, որի դրույթներին հետևելն ազատել էր Իրանին իր նկատմամբ ՄԱԿ-ի ԱԽ-ի, Եվրամիության ու ԱՄՆ-ի սահմանած տնտեսական ու ֆինանսական պատժամիջոցներից:
Սակայն 2018 թվականի մայիսին ԱՄՆ նախագահ Դոնալդ Թրամփը հայտարարել էր, որ Վաշինգտոնը դուրս է գալիս համաձայնագրից, ինչպես նաև հայտնել էր, որ ԱՄՆ-ն վերականգնում է Իրանի նկատմամբ սահմանած բոլոր պատժամիջոցները, այդ թվում՝ այն երկրների, որոնք բիզնես են վարում Իրանի հետ:
«Հնգյակն» ու Թեհրանը պայմանավորվել են մշակել ֆինանսական մեխանիզմ՝ ԱՄՆ-ի պատժամիջոցները շրջանցելով հաշվարկներ իրականացնելու համար: