Լույս է տեսել արցախցի երիտասարդ գրող Վովա Արզումանյանի «Խաղաղությունն ու ես» վերնագրով գիրքը, որը նվիրված է հայրենիքի պաշտպանության համար զոհված և կենդանի մնացած բոլոր հերոսներին։
Լույս է տեսել արցախցի գրողի «Խաղաղությունն ու ես» գիրքը
ՍՏԵՓԱՆԱԿԵՐՏ, 16 հունիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Վովա Արզումանյանն ասել է, որ գրքի տպագրությանը ֆինանսական օժանդակություն է ցուցաբերել ռուսաստանաբնակ բարերար Համլետ Վաչենանցը։
«Սա իմ երկրորդ գիրքն է: Գրքում ես եմ` իմ բոլոր ապրումներով։ Խաղաղությունը ներկայացրել եմ որպես կատարյալ երևույթ, որը միայն գունավոր եմ պատկերացնում։ Գրքում ոչ մի հերոսի չեմ անձնավորել, անուններ չեմ գրել։ Ամեն մեկը կարող է գտնել իր իրական հերոսին, որը արյուն է թափել մեր այսօրվա համար։ Գրքում տեղ են գտել վերջին շրջանում իմ գրած բանաստեղծությունները, որտեղ առանձնակի երանգավորմամբ ներկայացրել եմ հայրենիքը, սերը, երազը, կարոտը: Միահյուսված տողերում խաղաղությունը կատարյալ երևույթ է, կյանքը՝ կարոտով լցված, սերը՝ հայրենիքի և անձի երաշխավոր: Ուշադրություն եմ դարձրել կարոտի զգացողությանը, որը հանդիսանում է բանաստեղծություններիս հիմնական առանցքը: Անդրադառնալով տարբեր երևույթների՝ ընդգծում եմ հոգու ազնվությունն ու սիրո հավիտենական կյանքը»,-մասնավորապես ասել է Վ. Արզումանյանը:
Գրքի խմբագիր, բանասիրական գիտությունների թեկնածու Տաթև Սողոմոնյանի խոսքով՝ Վովա Արզումանյանի անունը հաճախ է հնչում արդի պոեզիան վերլուծելիս: Ավանդականն ու նորարարականը միահյուսելով՝ նա փորձում է իր արահետները բացել:
«Պատերազմի թեման, որ, թվում է, նոր սերունդը պիտի որպես անցյալի հուշ ներկայացնի, կրկին դարձավ տառապագին ճիչ, կորուստի ցավ, փոթորկեց պատանու ներաշխարհը, ստիպեց ավելի հասուն հայացքով աշխարհին նայել և խաղաղություն երազել»,-նշել է Տ. Սողոմոնյանը:
