ՍՏԵՓԱՆԱԿԵՐՏ, 6 հունիսի, ԱՐՑԱԽՊՐԵՍ։ Միաժամանակ ԱՀԿ գլխավոր տնօրեն Թեդրոս Ադհանոմ Գեբրեյեսուսն ասել է, որ դիմակներ կրելն արդյունավետ կլինի միայն այն դեպքում, եթե դրան զուգահեռ մարդիկ հետևեն պաշտպանվելու այլ կանոններին, մասնավորապես, պահպանեն սոցիալական հեռավորությունը և հաճախ լվանան ձեռքերը, գրում է azatutyun.am լրատվական կայքը:

Համաճարակի լայն տարածման վայրերում ԱՀԿ-ն խորհուրդ է տալիս, որ բուժհիմնարկներում բժշկական դիմակներ կրեն ոչ միայն COVID-19-ով հիվանդների հետ աշխատողներն, այլ բոլոր մարդիկ։ «Շրջաններում, որտեղ կա համավարակ, մենք խորհուրդ ենք տալիս, որ դիմակ կրեն քրոնիկ հիվանդություններ ունեցողները, 60 և ավելի բարձր տարիքի մարդիկ այնտեղ, որտեղ հնարավոր չէ պահպանել սոցիալական հեռավորությունը», - ասել է Գեբրեյեսուսը։

Նրա փոխանցմամբ, ԱՀԿ-ն կառավարություններին կոչ է անում հանրություններին հորդորել դիմակներ կրել այն վայրերում, որտեղ ֆիզիկական հեռավորությունն անհնար է, մասնավորապես, հանրային տրանսպորտում, խանութներում և այլ խիտ միջավայրում։

ԱՀԿ ղեկավարն ընդգծել է, որ այսօրվա դրությամբ համավարակը կանխելու լավագույն միջոցն է բացահայտել ախտահարումը, կարանտին իրականացնել, խնամել հիվանդին և պարզել նրա հետ շփումներ ունեցած մարդկանց շրջանակը։