Ամփոփվել են Հադրութի շրջվարչակազմի աշխատակազմի մշակույթի և երիտասարդության հարցերի բաժնի կողմից կազմակերպված մանկապատանեկան նկարչության չորրորդ մրցույթի արդյունքները. այն նվիրված էր երեխաների իրավունքների պաշտպանության միջազգային օրվան:
Ամփոփվել են մանկապատանեկան նկարչության չորրորդ մրցույթի արդյունքները
ՍՏԵՓԱՆԱԿԵՐՏ, 1 հունիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Հադրութի շրջվարչակազմի աշխատակազմի մշակույթի և երիտասարդության հարցերի բաժնի վարիչ Երազիկ Հայրիյանը՝ նշելով, որ, հաշվի առնելով Նոր տիպի կորոնավիրուսի տարածումը, մրցույթն առաջին անգամ անց է կացվել օն-լայն տարբերակով:
Նրա խոսքով՝ հանրապետության շրջաններից մրցույթին հայտ են ներկայացրել 124 մասնակիցներ, ովքեր ներկայացրել են 200 աշխատանք:
«Ստեղծել ենք մասնագիտական հանձնաժողով, որտեղ ընդգրկել ենք Ռուսաստանի Դաշնության, Լիտվիայի, Հայաստանի և Արցախի նկարիչներին: Չնայած այնքան էլ հեշտ չէր օն-լայն տարբերակով նման մրցույթ կազմակերպելը, ինչպես նաև հանձնախմբի անդամների հետ քննարկումներ իրականացնելը, բայց հաջող ավարտ ենք ունեցել: Մեր նպատակն էր ոչ միայն խրախուսել առաջնային տեղեր գրաված երեխաներին, այլև՝ ի հայտ բերել տաղանդաշատ անհատներին: Մրցանակային տեղեր գրավածներին կտրամադրվեն պատվոգրեր, նվերներ: Կազմակերպելով այս մրցույթը, մենք նաև նպատակ ունենք, որպեսզի, անկախ իրավիճակից, մշակութային կյանքն աշխուժանա: Շնորհակալություն եմ հայտնում հանձնախմբի անդամներին, քաղաքային և շրջանային մեր գործընկերներին, ինչպես նաև բոլոր մասնակիցներին, ովքեր ցանկություն են հայտնել համագործակցելու մեր կառույցի հետ: Ի դեպ, նշեմ, որ մասնագիտական հանձնածմբի բոլոր անդամները շնորհավորական ուղերձներ են հղել հունիսմեկյան տոնի կապակցությամբ»,-ավելացրել է Ե. Հայրիյանը:
Նա նշել է նաև, որ հանձնաժողովի կողմից մերժվել են արտատպված, կրկնօրինակված բոլոր աշխատանքները: Չեն ընդունվել նաև այն աշխատանքները, որոնք նախկինում մասնակցել են որևէ մրցույթի, ցուցադրվել են ցուցահանդեսներում կամ հրապարակվել են տպագիր կամ համացանցային աղբյուրներում: Գնահատման ընթացքում նախապատվությունը տրվել է բովանդակային պահանջների համապատասխանությանը, գաղափարի գեղարվեստական կատարման յուրօրինակությանը և որակին:
