ԱՀ Ազգային ժողովի նախագահ Արթուր Թովմասյանն այսօր՝ մայիսի 26-ին, ընդունել է «Միացյալ Հայաստան» կուսակցության անդամներին:
ԱԺ նախագահն ընդունել է «Միացյալ Հայաստան» կուսակցության անդամներին
ՍՏԵՓԱՆԱԿԵՐՏ, 26 մայիսի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ Արթուր Թովմասյանը շնորհակալություն է հայտնել նրանց հրավերն ընդունելու համար և իր խոսքում ընդգծել, որ Արցախյան հիմնախնդրի վերաբերյալ պետք է ցուցաբերել միասնական դիրքորոշում: Այնուհետև անդրադարձել է Հայոց ցեղասպանությանը և առաջնագծի շարունակական ամրապնդմանը:
Դիմելով կուսակցության անդամներին՝ նա մասնավորապես ասել է. ««Միացյալ Հայաստան» կուսակցության շնորհիվ՝ ի դեմս ղեկավար Վահան Բադասյանի, դեռևս չորրորդ գումարման Ազգային ժողովի ժամանակ եմ զգացել իրական ընդիմության ուժը: Նա առողջ քննադատություն էր հնչեցնում Արցախի, Հայաստանի իշխանությունների հասցեին: Նույնիսկ ապրիլյան պատերազմի ժամանակ իր դժգոհություններն է արտահայտել որոշ հրամանատարների պահվածքից: Ես կցանկանայի այս կուսակցությանը տեսնել Խորհրդարանում, բայց ունենք այն, ինչ ունենք: Եվ դա չի նշանակում, որ արտախորհրդարանական ուժերի կարծիքը չի կարևորվում: Այլ պետությունների հետ ստեղծել ենք բարեկամական շրջանակներ, որտեղ ընդգրկվելիս պարտադիր չէ պատգամավորի կարգավիճակը: Գտնում եմ, որ այդ բարեկամական խմբերում պետք է ընդգրկել նաև «Միացյալ Հայաստան» կուսակցության անդամներին: Կարևորում ենք ընդիմադիր կուսակցության անդամների կարծիքներն ու առաջարկները»:
ԱԺ նախագահը հույս է հայտնել, որ նման հանդիպումների հրավերները լինելու են համակողմանի, որի ընթացքում քննարկվելու են տարաբնույթ հարցեր:
Իսկ ««Միացյալ Հայաստան» կուսակցության ղեկավար Վահան Բադասյանն իր հերթին շնորհակալություն է հայտնել հրավերի համար և ողջունել արտախորհրդարանական ուժերի հետ նման հանդիպումները:
Անդրադառնալով Արցախյան հիմնախնդրին՝ Վ. Բադասյանն ասել է, որ իր կուսակցության անդամները գտնում են, որ խնդիրը պետք է կտրուկ վճռական փուլ մտնի: «Մենք գտնում ենք, որ մեր ուսերին տանում ենք Հայոց ցեղասպանության բեռը:
Մենք պետք ունենք Ցեղապանության հատուցմանը, այլ ոչ թե ճանաչմանը: Աղերսելով Ցեղասպանության ճանաչում՝ մենք դառնում ենք զարգացած երկրների խաղալիքը: Մենք պետք է խոհեմ գտնվենք, և օգտագործելով մեր բոլոր ռեսուրսները հզորացնենք մեր երկիրը: Ինչ վերաբերում է առաջնագծի շարունակական ամրապնդմանը, միանշանակ, համամիտ ենք»,- մասնավորապես ասել է Վ. Բադասյանը:
