ԱՀ Ազգային ժողովի նախագահ Արթուր Թովմասյանն այսօր՝ մայիսի 26-ին, հանդիպել է Արցախի կոմունիստական կուսակցության անդամների հետ:
Արթուր Թովմասյանը հանդիպել է Արցախի կոմունիստական կուսակցության անդամների հետ
ՍՏԵՓԱՆԱԿԵՐՏ, 26 մայիսի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ Արթուր Թովմասյանը կուսակցության անդամաների հետ քննարկել է մի շարք հարցեր, որոնք վերաբերում են Խորհրդարանի առաջիկա հինգ տարիների անելիքներին:
ԱՀ ԱԺ նախագահը նշել է, որ կրթական համակարգը կոմունիստական հասարակարգում եղել է լավագույնը և ունեցել է իր ուրույն դերը: Անվճար առողջապահական համակարգի առկայությունը ևս կարևոր նշանակություն ուներ, և կոմունիստական տարիներին մարդը գերագույն արժեք էր:
«Իմ աշխատանքի հիմքում դրել եմ մարդասիրությունը: Ես հպարտ եմ, որ ավարտել եմ խորհրդային դպրոցը, բուհը և ասպիրատուրան: ԱՀ նորընտիր նախագահ Արայիկ Հարությունյանի նախընտրական ծրագրում ներառված անվճար առողջապահության և կրթության վերաբերյալ կետերը վերցրել ենք հենց կոմունիստներից: Մենք հետևելու ենք կրթության որակին: Ունենք տաղանդավոր երեխաներ, ովքեր պետք է անվճար կրթություն ստանան: Այսօր մեզ համար շատ կարևոր է նաև մեր ժողովրդի առողջության հարցը»,- ավելացրել է Ա. Թովմասյանը՝ նշելով, որ ցանկալի կլինի, եթե կոմունիստական կուսակցությունը ձևավորի երիտասարդական թև:
Ըստ Ա. Թովմասյանի՝ նման հանդիպումները պետք է պարբերական բնույթ կրեն, որը կնպաստի երկրի արտախորհրդարանական ուժերի հետ համագործակցության ամրապնդմանը:
«Մենք համոզված ենք, որ Արցախը կլինի անվտանգ, եթե ունենանք կայուն Հայաստան և հզոր Սփյուռք»,-ընդգծել է Ա. Թովմասյանը և հավաստել, որ դա հնարավոր է միայն եթե Արցախում լինի հանդուրժողականության և համերաշխության մթնոլորտ:
Արցախի կոմունիստական կուսակցության առաջնորդ Բահատուր Դավթյանն իր հերթին շնորհավորել է Արթուր Թովմասյանին՝ ԱԺ նորընտիր նախագահի պաշտոնն ստանձնելու կապակցությամբ:
Նրա համոզմամբ՝ Ա. Թովմասյանն իր ունեցած փորձով ու գիտելիքներով կկարողանա Արցախի օրենսդրական դաշտում աշխատանքներ իրականացնել: