«Ազատ հայրենք - ՔՄԴ» կուսակցությունների դաշինքի առաջնորդ, Արցախի Հանրապետության նախագահի թեկնածու Արայիկ Հարությունյանը ֆեյսբուքյան իր էջով հանդես է եկել ուղերձով, որտեղ իր երախտագիտությունն է հայտնել արցախահայությանը մարտի 31-ին կայացած համապետական ընտրություններին ակտիվ մասնակցելու և իր ղեկավարած քաղաքական դաշինքին ու իր թեկնածությանը հայտնած բարձր վստահության համար:
Մարտի 31-ին արձանագրեցինք Արցախի քաղաքացու հաղթանակը. Արայիկ Հարությունյանն ուղերձ է հղել
ՍՏԵՓԱՆԱԿԵՐՏ, 1 ապրիլի, ԱՐՑԱԽՊՐԵՍ։ Ուղերձում ասված է.
«Հարգելի՛ հայրենակիցներ
Իմ խորին հարգանքն ու երախտագիտությունն եմ ուզում հայտնել յուրաքանչյուրիդ՝ մարտի 31-ին քաղաքացիական բարձր գիտակցություն ցուցաբերելու և ընտրություններին ակտիվ մասնակցելու համար: Մենք մեր ամուր կամքի և վճռականության շնորհիվ մեկ անգամ ևս ապացուցեցինք ողջ քաղաքակիրթ աշխարհին, որ Արցախի ինքնիշխան Հանրապետությունը միջազգային հարթակներում պետք է ստանձնի իր ուրույն տեղն ու դերը:
Սիրելի՛ հայրենակիցներ
Ձեր վստահության քվեի շնորհիվ «Ազատ հայրենք -ՔՄԴ» կուսակցությունների դաշինքը Խորհրդարանում կունենա ամենամեծ խմբակցությունը՝ 16 պատգամավորական մանդատով: Կրկին հայտնելով երախտագիտությունս՝ հավաստիացնում եմ, որ, շնորհիվ ձեր մեծ աջակցության, մեր քաղաքական թիմը պատրաստ է կյանքի կոչելու այն բոլոր ծրագրերը, որոնք ձեր դատին ենք ներկայացրել նախընտրական շրջանում:
Ես ողջունում եմ նաև խորհրդարանական մեր ապագա բոլոր գործընկերներին, որոնց հետ շուտով պետք է ակտիվ և արդյունավետ աշխատանքներ ծավալենք: Բազմակուսակցական խորհրդարանի գործունեությունը մեր իրականության մեջ, համոզված եմ, նոր որակ է հաղորդելու օրենսդրական աշխատանքին:
Անդրադառնալով նախագահական ընտրությունների արդյունքներին՝ հարկ եմ համարում նշել, որ դրանք մեկ անգամ ևս փաստեցին այն, որ Արցախում ժողովրդավարական արժեքներն այլընտրանք չունեն: Բոլորս համոզվեցինք, որ յուրաքանչյուրիս քվեն ոչ միայն կարևոր է, այլև որոշիչ:
Մարտի 31-ին արձանագրեցինք Արցախի քաղաքացու հաղթանակը. մեր երկրում կայացան ազատ, արդար և մրցակցային ընտրություններ: Սա բոլորիս ձեռքբերումն է: Սահմանադրական ճանապարհով իշխանություն ձևավորելու հաջորդ հանգրվանն ընտրությունների երկրորդ փուլն է, և մենք միասնաբար ու ավելի ամուր ճակատով, կդիմագրավենք բոլոր այն մարտահրավերներին, որոնք ծառացած են մեր միասնական հայրենքի ու ժողովրդի առաջ:
Եվս մեկ հարց, որին հարկ եմ համարում անդրադառնալ, վերաբերում է նոր տեսակի կորոնավիրուսի տարածման վտանգին: Համաշխարհային այս համաճարակը ողջ մարդկությանը նետված մարահրավեր է: Խնդրում եմ ձեզ խստորեն պահպանել առողջապահության նախարարության ցուցումները: Ի դեպ, իրավիճակով պայմանավորված՝ պատրաստ ենք հետևելու իշխանության ցանկացած որոշման:
Կեցցե՛ Արցախի հերոսական Հանրապետությունը:
Կեցցե՛ Մայր Հայրենիքը:
Կեցցե՛ հայ ժողովուրդը, որի կենսական և հզոր ներուժն առավելագույնս կծառայեցվի ի շահ և ի բարօրություն հայոց աշխարհի»:
Հիշեցնենք, որ մարտի 31-ին կայացած համապետական ընտրություններին մասնակցում էին 14 նախագահի թեկնածուներ: Ստացված արդյունքի համաձայն՝ Արայիկ Հարությունյանը ստացել է 36076 քվե կամ 49.26 %, իսկ «Ազատ Հայրենիք-Քաղաքացիական միացյալ դաշինք» կուսակցությունների դաշինքը կստանա 16 մանդատ:
Նշենք, որ ընտրություններին մասնակցել է 76 հազար 471 ընտրող կամ ընտրողների ընդհանուր թվի 72, 7 %-ը: