Արցախում առ այսօր նոր կորոնավիրուսի վարակման դեպք չի գրանցվել, և կարծում եմ՝ Արցախի իշխանությունները կգտնեն այն մեխանիզմը, որի պարագայում կկանխվեն վտանգները ու կկազմակերպվի նախագահական ընտրությունների երկրորդ փուլը:
Հուսով եմ՝ կորոնավիրուսի պատճառով աշխարհում ստեղծված իրավիճակը չի խոչընդոտի Արցախում ընտրությունների երկրորդ փուլի կայացմանը. Ալեն Սիմոնյան
ՍՏԵՓԱՆԱԿԵՐՏ, 1 ապրիլի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին այսօր կայացած ՀՀ Ազգային ժողովի դիտորդական խմբի մամուլի ասուլիսի ընթացքում ասել է ՀՀ ԱԺ փոխխոսնակ Ալեն Սիմոնյանը:
«Կարծում եմ՝ նախագահական ընտրությունների երկրորդ փուլը կլինի ավելի լավ կազմակերպված: Բոլորս էլ հասկանում ենք, թե որքան կարևոր է Արցախի Հանրապետությունում հերթական ընտրությունների կայացումը: Եվ հույս ունեմ, որ աշխարհում տիրող իրավիճակը՝ կապված նոր կորոնավիրուսի տարածման հետ, չի կարող խոչընդոտել, որպեսզի նախագահական ընտրությունների երկրորդ փուլը անցկացվի»,- նշել է Ա. Սիմոնյանը:
Իր հերթին «Լուսավոր Հայաստան» խմբակցության պատգամավոր Անի Սամսոնյանն ասել է, որ այն թերությունները, որոնք հայտնաբերվել էին առաջին փուլում, պետք է շտկվեն, իսկ ընտրական գործընթացը անցկացվի ավելի բարելավված ձևով: Պատգամավորի կարծիքով՝ երկրորդ փուլին մասնակցությունը կլինի շատ ավելի բարձր:
