Մարտի 31-ին կայանալիք համապետական ընտրությունների քվեարկության ողջ օրը Ստեփանակերտի և Արցախի բոլոր շրջկենտրոնների շուրջ 48 ընտրատեղամասերից առցանց ուղիղ հեռարձակում կլինի:
Արցախի 48 ընտրատեղամասերից քվեարկության ողջ օրը ուղիղ հեռարձակում կլինի
ՍՏԵՓԱՆԱԿԵՐՏ, 30 մարտի, ԱՐՑԱԽՊՐԵՍ։ Այս մասին «Ֆեյսբուք» սոցիալական ցանցի ուղիղ եթերի ժամանակ ասել է «Իրավական կրթություն և վերահսկողություն» հասարակական կազմակերպության համահիմնադիր, իրավաբանական գիտությունների թեկնածու, դոցենտ Արփինե Հովհաննիսյանը:
««Իրավական կրթություն և վերահսկողություն» ՀԿ-ն և կազմակերպության արցախյան մասնաճյուղը դիտորդական առաքելություն կիրականացնեն քվեարկության ողջ օրվա ընթացքում: Պետք է փաստենք, որ այս ընտրություններն առանձնանում են ոչ միայն նրանով, որ արցախցին պետք է որոշի իր անվտանգության ու զարգացման տեսլականը, այլև, որ դրանք տեղի են ունենալու աշխարհը պատուհասած կորոնավիրուսային համաճարակի պայմաններում, որից զերծ է Արցախը: Մեր կազմակերպությունը որոշակի փոփոխություններ է իրականացրել իր դիտորդական առաքելության ձևաչափում: Մասնավորապես՝ ի սկզբանե որոշվել էր, որ դիտորդական առաքելությունն իրականացվելու է բազմամարդ, սակայն այն, ինչ վերջին շաբաթների ընթացքում տեղի ունեցավ Հայաստանում, ստիպեց մեզ ավելի սահմանափակ թվով դիտորդներ ընդգրկելու միջազգային կազմակերպության ձևաչափում: Բացի այդ, մենք մեր դիտորդների համար նախատեսված դասընթացները կազմակերպել ենք առցանց եղանակով»,- նշել է Ա. Հովհաննիսյանը:
Նրա խոսքով՝ կազմակերպությունը ԿԸՀ-ում գրանցել է շուրջ 140 դիտորդ, որից 138-ը Արցախից են: «Որևէ պարագայում չի կարելի թույլ տալ, որպեսզի դիտորդական առաքելությունը վերածվի բացահայտ կամ թաքնված որևէ թեկնածուի սատարելու կամ էլ խոչընդոտելու գործընթացի: Այս առումով մեր կազմակերպությունը հետևողական է լինելու ինչպես իր, այնպես էլ այլ կազմակերպությունների վարքագծի նկատմամբ: Մենք այստեղ ենք, որպեսզի արցախցու քվեն լինի հասցեական, և այս դժվարին պայմաններում արցախցին ցույց տա, որ ունակ է ժողովրդական մակարդակով ընտրություններ կազմակերպելու»,- ավելացրել է Ա. Հովհաննիսյանը:
Ընտրատեղամասերից առցանց ուղիղ հեռարձակման մաիսն ֆեյսբուքյան էջում գրառում է կատարել նաև ԱՀ ՄԻՊ Արտակ Բեգլարյանը.
«Քվեարկության ողջ օրը ամենամեծ 48 ընտրատեղամասերից առցանց ուղիղ եթեր է հեռարձակվելու: Արցախի հանրային հեռուստատեսության և մասնագիտացված կազմակերպությունների կողմից այժմ վերջին աշխատանքներն են տարվում, որ վաղը հնարավոր լինի Ստեփանակերտի ու շրջկենտրոնների բոլոր 48 ընտրատեղամասերից քվեարկության ու հաշվարկի ողջ ընթացքը առցանց ուղիղ եթերով հեռարձակել: Հեռուստատեսությունը առավոտյան կհրապարակի համապատասխան հղումները: Սա ողջունելի նախաձեռնություն է քվեարկության թափանցիկության լրացուցիչ երաշխիքների ապահովման գործում: Հուսամ՝ հաջորդ ընտրություններին հնարավոր կլինի բոլոր ընտրատեղամասերից ուղիղ եթեր ապահովել:
Իսկ ինչ վերաբերում է քվեարկության կազմակերպման աշխատանքներին, ապա ոչ միայն պետք է պատշաճ պայմաններ ապահովել ընտրական իրավունքների իրացման համար, այլ նաև այս իրավիճակում պետական մարմինների և ընտրական գործընթացում ներառված բոլոր անձանց (ներառյալ՝ ընտրողների) ամենամեծ ուշադրությունը պետք է դարձվի առողջապահական վտանգների չեզոքացման վրա: Փաստորեն, վաղը իրացնում ենք մեր ընտրական ու առողջապահական իրավունքները: Ընտրությունների ավարտից հետո մենք կամփոփենք ընտրական ողջ գործընթացում ՄԻՊ աշխատակազմի ստացած դիմումներն ու կատարած աշխատանքները և հանդես կգանք համապատասխան առաջարկներով:
Առողջ եղեք և ընտրեք սեփական կամքով ու խղճի թելադրանքով»:
