Հիմք ընդունելով Արցախի Հանրապետության Նախագահի` հանրապետությունում կորոնավիրուսի տարածման կանխարգելմանն ուղղված 2020 թվականի մարտի 13-ի հանձնարարականները, Արցախի Հանրապետության պետական նախարարի 2020 թվականի մարտի 13-ի,14-ի և18-ի գրությունները՝ Հադրութի շրջվարչակազմը շարունակում է աշխատանքներ իրականացնել շրջանում կորոնավիրուսի տարածման կանխարգելման ուղղությամբ:
Հադրութի շրջվարչակազմը շարունակում է աշխատանքներ իրականացնել շրջանում կորոնավիրուսի տարածման կանխարգելման ուղղությամբ
ՍՏԵՓԱՆԱԿԵՐՏ, 25 մարտի, ԱՐՑԱԽՊՐԵՍ։ Այս մասին տեղեկացրին «Արցախ / Տեղեկատվական շտաբ»-ից:
Հիմնարկ-ձեռնակություններին հանձնարարվել է կազմակերպել կանխարգելիչ և հակահամաճարակային միջոցառումներ: Բացատրական աշխատանքներ են տարվում Հադրութ քաղաքում և համայնքներում՝ բնակչության շարժը հնարավորինս սահմանափակելու ուղղությամբ, արգելված է մասսայական միջոցառումների կազմակերպումը: Բոլոր հիմնարկ-ձեռնարկություններին բաժանվել են ձեռքերի ախտահանման նյութեր (ալկոգելեր):Ընթացքի մեջ է շրջանի համար ախտահանման նյութերի, դիմակների և ջեռմաչափերի ձեռք բերման գործընթացը: «Հակահամաճարակային և հիգիենայի կայան» ՊՈԱԿ-ի կողմից շարունակվում է վարչական շենքերի, երթուղային ավտոբուսների, առևտրի կետերի և մյուս հիմնարկ-ձեռնարկությունների ախտահանումը: Ոստիկանության աշխատողների կողմից ջերմաչափվում են «9-րդ կմ»-ում և Մեխակավանում տեղակայված հսկիչ կետերով անցնող ուղևորները, հատկապես խիստ վերահսկողության տակ են գտնվում ՀՀ-ից ժամանած անձինք:
Հադրութի շրջվարչակազմի աշխատակազմի մշակույթի և երիտասարդության հարցերի բաժնի կողմից կատարվում է կամավորների հավաքագրում, ովքեր անհրաժեշտության դեպքում կօգնեն միայնակ և ինքնամեկուսացման մեջ գտնվող մարդկանց՝ դեղորայք և սնունդ մատակարարելու հարցում: Արդյունքում, կոչին արդեն իսկ արձագանքել են կամավորներ Հադրութ քաղաքից և շրջանի գյուղերից, և ձևավորվել է ՄԵ հարցերի բաժնի երիտասարդական խորհրդին կից կամավորական շտաբ: Շտաբի կազմում են՝ Հադրութի քաղաքապետը, ՄԵ հարցերի բաժնի վարիչը, ՀՀԲ ՊՈԱԿ տնօրենը, ԱԻՊԾ Հադրութի ՇԱԻԲ պետը, ԱՍՎՆ տնային սպասարկման կենտրոնի աշխատողը, ոստիկանության Հադրութի շրջբաժնի ծառայողներ, ակտիվ երիտասարդներ: Մարտի 24-ին կամավորական շտաբի անդամները Հադրութի ՀՀԲ կողմից պատրաստված ալկոգելի տարաների են տեղադրել քաղաքի տարբեր հատվածներում՝ բանկոմատների, տերմինալների, ավտոմեքենաների լվացման կետերի և վենդինգ ապարատների մոտ: