2019 թվականին Արցախում կենսունակության գործակիցը (ծնվածների և մահացության դեպքերի հարաբերակցությունը) կազմել է 183.5 %: Ըստ այդմ՝ հանրապետությունում ծնվածների թիվը կազմել է 2119 երեխա, իսկ մահացածների թիվը` 1155 մարդ:
Անցած տարում Արցախում կենսունակության գործակիցը կազմել է 183.5 %
ՍՏԵՓԱՆԱԿԵՐՏ, 28 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած ամփոփիչ մամուլի ասուլիսի ժամանակ ասել է ԱՀ Ազգային վիճակագրական ծառայության նախագահ Մանուշ Մինասյանը:
Նրա խոսքով՝ 2019թ. բազմապտուղ ծնունդների դեպքերի թիվը 32 է` նախորդ տարվա 26-ի փոխարեն: Բազմապտուղ ծնունդներից 32-ը երկվորյակ են: Մեռելածինների թիվը ընթացիկ տարում կազմել է 12 երեխա` նախորդ տարվա 8 երեխայի դիմաց:
Ըստ ծննդի հերթականության 2019թ. ծնվածների դիտարկումը ցույց է տալիս, որ առաջնածին են 682 երեխա կամ ծնվածների 32.2%-ը, ընտանիքում ծնված երկրորդ երեխաների թիվը 672 է կամ ծնվածների 31.7%-ը, ընտանիքում ծնված երրորդ և հաջորդ երեխաների թիվը 765 է կամ ծնվածների 36.1%-ը: Մոր միջին տարիքը երեխայի ծննդյան ժամանակ Արցախում 2019թ. կազմել է 28.3 տարեկան, ընդ որում առաջնեկ ունեցող մոր միջին տարիքը` 24.7 տարեկան:
Ծնված երեխաների անվանակոչման դիտարկումը խոսում է աղջիկների համար Նարե (46դեպք), Մարիա (44դեպք), Մարիամ (40դեպք), Անի (32 դեպք) և Աննա (32 դեպք), տղաների համար Դավիթ (65 դեպք), Տիգրան (48 դեպք), Մարկ(44 դեպք), Գոռ (77 դեպք) և Նարեկ (33դեպք) անունների ավելի հաճախակի անվանակոչման մասին: Նորածինների առավել հաճախ կրկնվող ազգանունները, և աղջիկների, և տղաների ցուցակներում առաջին 2 հորիզոնականները զբաղեցնում են նույն ազգանունները՝ Սարգսյան և Գրիգորյան:
Մահացածության պատճառական կառուցվածքի ըստ հիվանդության դասերի դիտարկման արդյունքում բարձր տեսակարար կշիռներ ունեն արյան շրջանառության համակարգի հիվանդությունները` 61.1%, նորագոյացությունները` 19.7%: Ըստ տարիքային խմբերի մահացածների դիտարկմամբ ունենք հետևյալ պատկերը. մինչև 70 տարեկան մահացածները կազմել են ընդհանուրի 34.5%-ը, 70-ից բարձր տարեկանները` 65.5%-ը:
Մանկամահացությունը (մինչև 1 տարեկան մահացած երեխաների թիվը 1000 կենդանածնի հաշվով) 2019թ. կազմել է 10.9 երեխա կամ 23 դեպք, երեխաների մահացությունը (մինչև 5 տարեկան մահացած երեխաների թիվը 1000 կենդանածնի հաշվով)` 7.6 երեխա կամ 28 դեպք: 2019թ. մայրական մահացության դեպք չի գրանցվել: 2019թ. հանրապետությունում գրանցվել են 836 ամուսնության և 207 ամուսնալուծության դեպքեր: Հանրապետությունում ամուսնության միջին տարիքը տղամարդկանց շրջանում կազմել է 28.9, կանանց մոտ` 24.9տարեկան, իսկ առաջին ամուսնության միջին տարիքը, համապատասխանաբար 27.8 և 24 տարեկան:
2019թ. պաշտոնապես հաշվառված եկողների թվաքանակը կազմել է 560 մարդ, մեկնողների թվաքանակը` 747մարդ, արդյունքում 2019թ. մեխանիկական հավելաճը բացասական է՝ 187 մարդ: Եկողների 83.8 տոկոսը և մեկնողների 99.7 տոկոսը բաժին է ընկել Հայաստանի Հանրապետությանը: