2019 թ-ին ակտիվացվել են աշխատանքները նախնական տեխնոլոգիական կրթության ապահովման և դպրոցներում ժամանակակից կրթական տեխնոլոգիաների ներդրման ուղղությամբ:
Պետական և բարեգործական միջոցներով հանրապետությունում բացվել են հինգ «Արմաթ» ինժեներական լաբորատորիաներ
ՍՏԵՓԱՆԱԿԵՐՏ, 27 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած մամուլի ասուլիսի ժամանակ ասել է ԱՀ կրթության, գիտության և սպորտի նախարար Նարինե Աղաբալյանը:
Նա նշել է, որ, մասնավորապես, պետական և բարեգործական միջոցներով 5 «Արմաթ» ինժեներական լաբորատորիաներ են բացվել Շուշիի շրջանի Հին շենի, Քարին տակի, Մարտունու շրջանի Խնուշինակի, Ճարտարի N 1, Հադրութի շրջանի Մեծ Թաղերի դպրոցներում, ընդ որում, վերջին 4-ը՝ Հայ կրթական հիմնարկության հովանավորությամբ:
«Մի շարք դպրոցներ, բարեգործական խողովակներով, համալրվել են համակարգչային տեխնիկայով և այլ գույքով: Ավելացել է «Թումոբուս» ծրագրի շահառուների թիվը՝ ներառելով Խնուշինակ, Առաջաձոր, Հադրութ համայնքների դպրոցականներին: Ոչ ֆորմալ կրթության ծրագրի շրջանակներում իրականացվել է «Ես» դրամաշնորհային ծրագիրը համանուն հասարակական կազմակերպության միջոցով՝ Մարտունու, շրջանի Հաղորտի, Մուշկապատ, Գիշի, Խնուշինակ և Սպիտակաշեն համայնքների դպրոցականների համար»,-ավելացրել է նախարարը:
