Այսօր՝ փետրվարի 26-ին, ԱՀ-ում պաշտոնական մեկնարկել է մարտի 31-ին կայանալիք համապետական ընտրությունների քարոզարշավը:
«Ազատ հայրենիք-ՔՄԴ» դաշինքը քարոզարշավը սկսել է յուրահատուկ նախաձեռնությամբ
ՍՏԵՓԱՆԱԿԵՐՏ, 26 փետրվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ Արցախի ամենամեծ քաղաքական ուժը՝ «Ազատ հայրենիք-ՔՄԴ» դաշինքը քարոզարշավը սկսել է յուրովի՝ հանդուրժողականության կոչ հղելով բոլոր քաղաքական ուժերին:
Նրանք կազմակերպել են երթ դեպի Ստեփանակերտի Աստվածամոր Սուրբ հովանի Մայր տաճար, որի բակում քաղաքական ուժի առաջնորդ, ԱՀ նախկին վարչապետ Արայիկ Հարությունյանը հազարավոր կուսակիցների, համակիրների առջև հանդես է եկել կոչով, որտեղ մասնավորապես ասվել է. «Մեր առաջին հանդիպման խորհուրդն այլ է: Մեր հանդիպումը կարող էր լինել առաջնագծին մոտիկ: Բայց մի՞թե ամբողջ Արցախն ինքն առաջնագիծ չէ: Փոխարենը որոշեցինք Աստծո տուն գալ, գալ՝ խոնարհվելու: Այո, խոնարհվելու և հիշելու, որ ինչ խոստումներ էլ վաղը՝ նախընտրական հանդիպումների ժամանակ, տանք, ինչ հավակնոտ ծրագրեր էլ ներկայացնենք, մենք ընդամենը մահկանացուներ ենք և ունենք միանգամայն բնական ձգտում՝ մեր զավակներին թողնել ավելի ապահով, ավելի հզոր, ավելի զարգացած հայրենիք: Սա է այն ձգտումը, որը բոլորիս այսօր կողք կողքի է հավաքել, դարձրել մի բռունցք: Անգամ շատ ցանկալի իշխանությանը պետք է հասնել մի ճանապարհով, որը հիշելով՝ վաղը չենք ամաչի: Օրինակելի, մրցակցային ու ազնիվ ընտրություններ անցկացնելը բոլորիս շահերից է բխում և ամենից առաջ՝ մեր երիտասարդ պետության շահերից»:
Նա իր խոսքում ընդգծել է, որ «Ազատ հայրենիք»-ը լոկ Արցախին ծառայելու պատրաստակամություն հայտնող քաղաքական ուժերից է և առաջիկա շաբաթների ընթացքում ժողովրդին ներկայացնելու է ավելի լավ ապագա, ավելի զարգացած, ավելի ուժեղ ու ամուր երկիր ունենալու իր ծրագիրը:
«Մեր ծրագրերը տարբեր են, ընդհանուրն Արցախը հզորացնելու ցանկությունն է: Առաջարկում եմ քարոզարշավի անգամ ամենաակտիվ շրջանում չմոռանանք այդ ընդհանուր նպատակը: Իմ կոչն եմ ուղղում ընտրարշավի բոլոր մասնակիցներին՝ լինել հարգալից իրար նկատմամբ: Անկախ նրանից, թե ընտրություններում ով ինչ հաջողության է հասնելու, բոլորս էլ շարունակելու ենք ապրել Արցախում և, անհրաժեշտության դեպքում, կողք- կողքի կռվելու ենք նույն խրամատում: Պետք է քաղաքական դիսկուսները դիտարկել բացառապես գաղափարական-մրցակցային դաշտում: Ընտրությունները համարում ենք Արցախը ևս մեկ աստիճանով բարձրացնելու հնարավորություն: Այս շրջանից մեր հայրենիքը պետք է դուրս գա ավելի ուժեղ, միասնական, քան այսօր է: Ժողովրդավարությունն Արցախում այլընտրանք չունի: Սա պետք է գիտակցի քաղաքական ուժերից յուրաքանչյուրը»,- ավելացրել է Ա. Հարությունյանը՝ խոսքը եզրափակելով հետևյալ նախադասությամբ. «Կեցցե´մեր ժողովուրդը, որ ապրելու է ավելի բարեկեցիկ և բարգավաճ երկրում»:
Ելույթից հետո նախաձեռնության մասնակիցները երկինք են բաց թողել ճերմակաթույր աղավնիներ՝ ի նշան հավերժող խաղաղության և հանդուրժողականության: Դրան հաջորդել է մոմավառությունը:
Ի դեպ, այսօր նույն ժամին հանրապետության գրեթե բոլոր քաղաքներում «Ազատ հայրենիք-ՔՄԴ» քաղաքական ուժի նախաձեռնությամբ կազմակերպվել է նման ակցիա:
