Խորհրդարանի այսօրվա նիստին «Հայրենիք» խմբակցության պատգամավոր Ռամելա Դադայանը պատգամավորական հայտարարության մեջ անդրադարձել է Արցախյան գոյամարտում մարտական գործողությունների ժամանակ 2 և ավելի զավակ կորցրած ծնողների բանավոր և գրավոր դիմումներին:
Պատգամավորն առաջարկել է աջակցության մեխանիզմներ մշակել 2 և ավելի զավակ կորցրած ծնողների համար
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ պատգամավորն իր խոսքում նշել է, որ 2017 թվականից Հայաստանում ուժի մեջ է մտել «Զինծառայողների կյանքին կամ առողջությանը պատճառած վնասների հատուցման հիմնադրամ»-ի գործունեությունը:
«Համոզված եմ՝ բոլորիս համար բացարձակ ճշմարտություն է, որ հիմնադրամի շահառու համարվող բոլոր զինծառայողներն ու նրանց ընտանիքները կարևոր են մեզ համար, քանզի պարտական ենք նրանց այսօրվա և վաղվա համար: ՀՀ կառավարության որոշմամբ՝ հիմնադրամի կողմից շահառուները ստանում են համապատասխան լրացուցիչ դրամային շնորհներ: Այսօր այն ՀՀ-ում և ԱՀ-ում տարածվում է հետադարձ տարեթվերով՝ մինչև 2008 թվականը: Ըստ շրջանառվող լուրերի՝ տարեցտարի տարեթվերի իջեցման միտում կա: Արցախում 2 և ավելի զոհ ունեցող 100-ից ավելի ընտանիքներ կային: Այսօր դրանց թիվը հասել է 71-ի, ընդ որում՝ 2-ը 3 զավակ կորցրած ընտանիքներ են, իսկ ծնողների տարիքը՝ 75-ից բարձր: Զավակներին կորցրել են հիմնականում մինչև 1995 թ: Ծնողների խնդրանքն է նման կարգավիճակ ունեցողներին ընդգրկել դրամաշնորհ ստացողների գործող ցուցակում: Քանի որ Արցախի կառավարությունն իրավասու չէ այդ հարցը լուծելու, ուստի առաջարկում ենք ԱՀ կառավարությանը միջնորդությամբ դիմել ՀՀ կառավարությանը, որպեսզի հիմնադրամի հոգաբարձուների խորհրդում քննարկվի և, հարմար գտնելու դեպքում, անհրաժեշտ լուծում տրվի նշված խնդրանքին: Ոչ մի նյութական արժեք խոցված սրտին սփոփանք չէ, սակայն ուշադրությունն ու բարոյական կողմը գոնե բալասան կարող են լինել»,- մասնավորապես նշել է Ռ. Դադայանը: