Այսօր կայացել է վեցերորդ գումարման Ազգային ժողովի վերջին՝ 11-րդ նստաշրջանի առաջին նիստը, որին ներկա էին 27, բացակա՝ 6 պատգամավորներ:
Վեցերորդ գումարման Խորհրդարանը գումարել է վերջին նստաշրջանի առաջին նիստը
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ նիստին ԱՀ Ազգային ժողովի նախագահ Աշոտ Ղուլյանը շնորհավորել է Արցախի Վերածննդի օրվա առթիվ և մաղթել հայ ժողովրդին կամք ու նորանոր հաջողություններ:
Անդրադառնալով Խորհրդարանի առաջիկա գործունեությանը՝ Ա. Ղուլյանն ասել է, որ, ամենայն հավանականությամբ, մարտ ամսին Ազգային ժողովի հերթական նիստ չի լինելու՝ հաշվի առնելով, որ քաղաքական ուժերը ընդգրկվելու են նախընտրական քարոզարշավում:
Հաջորդ նիստը կլինի ապրիլին, իսկ մայիսի 21-ին նախատեսվում է յոթերորդ գումարման նոր Ազգային ժողովի առաջին նիստը:
Այսօրվա նիստին Խորհրդարանը երկրորդ ընթերցմամբ 27 կողմ ձայնով ընդունել է «Փրկարարական ծառայության կանոնագիրքը հաստատելու մասին» օրենքի նախագիծը: ԱԻՊԾ տնօրեն Վլադիկ Խաչատրյանի խոսքով՝ օրենքի նախագծի վերաբերյալ այս ընթացքում նոր առաջարկություններ չեն եղել:
Փոփոխություններ և լրացումներ են կատարվել «Զինվորական ծառայության և զինծառայողի կարգավիճակի մասին» օրենքում, որն ընդունվել է 26 կողմ ձայնով:
Մի շարք նախագծեր էլ օրենսդիրի քննարկմանն են ներկայացվել ԱՀ արդարադատության նախարար Արարատ Դանիելյանի կողմից: «Քրեական օրենսգրքում լրացում կատարելու մասին», «Նոտարիատի մասին» օրենքում լրացում կատարելու մասին, «Հասարակական կազմակերպությունների մասին» (օրենքը ներկայացվել է կից փաթեթով), «Ինտերնետով հրապարակային և անհատական ծանուցման մասին» (առաջին ընթերցում), Քաղաքացիական օրենսգրքում լրացումներ կատարելու մասին» (ներկայացվել է հարակից օրենքով) նախագծերը գլխադասային՝ ԱԺ պետաիրավական հարցերի մշտական հանձնաժողովի կողմից դրական եզրակացություն ստանալուց հետո ընդունվել են Խորհրդարանի կողմից:
Լրացումներ և փոփոխություններ են կատարվել նաև Ջրային օրենսգրքում, որն ընդունվել է 20 կողմ, 3 դեմ ձայների հարաբերակցությամբ:
Այսօրվա նիստին տեղի է ունեցել նաև օրենսդիր-գործադիր հարցուպատասխան, որի ընթացքում խորհրդարանականների կողմից կառավարության անդամներին են ուղղվել, ընդհանուր առմամբ, 4 հարցեր, որոնք հիմնականում վերաբերում էին վերաբնակեցման, կրթության, և բնապահպանության ոլորտներին:
Նիստի վերջում պատգամավորներ Ռամելա Դադայանը և Հայկ Խանումյանը հանդես են եկել պատգամավորական հայտարարություններով:
