Արցախի Հանրապետության առողջապահության նախարարի հրամանով ստուգումներ են իրականացվել Ստեփանակերտում գործող 5 դեղատներում:
Ստեփանակերտի որոշ դեղատներում խախտումներ են արձանագրվել
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է ԱՀ առողջապահության նախարարության իրավաբանական և լիցենզավորման բաժնի վարիչ Լուսինե Հովհաննիսյանը՝ նշելով, որ ստուգումների արդյունքում արձանագրվել են որոշակի խախտումներ, այդ թվում՝ ՀՀ-ում չգրանցված և ապօրինի ԱՀ ներմուծված ժամկետանց դեղորայքի առկայություն:
Լ. Հովհաննիսյանի խոսքով՝ Ստեփանակերտում գործում է 33 դեղատուն:
Խոսելով կոնկրետ 5 դեղատներում իրականացված ստուգումների մասին՝ մեր զրուցակիցը տեղեկացրել է, որ քաղաքացիները փաստ են արձանագրել, որ հենց այդ դեղատներում է իրականացվում չգրանցված որոշ դեղերի վաճառք, որոնք Երևանի փորձագիտական կենտրոնում չեն ենթարկվել լաբորատոր հետազոտության և, հետևաբար, անօրեն են վաճառվում:
«Այդ կապակցությամբ նախարարի համապատասխան հրամաններով կասեցվել են մայրաքաղաքում գործող «ԿԼԱՍ-ՖԱՐՄ», «Մ.Մ.Մ. ՍԱՂՅԱՆ», «ՖԱՐՄ-ՄԱՐԿԵՏ» ՍՊ ընկերությունները, ինչպես նաև «ՎԱՆ» ԱԿ և Քրիստինե Իսկանդարյան ԱՁ դեղատների լիցենզիաների գործողությունները` մեկամսյա ժամկետով՝ խախտումները վերացնելու պայմանով: ԱՀ առողջապահության նախարարությունը հորդորում է Արցախի Հանրապետությունում գործող դեղատներին ու դեղատնային կրպակներին խստիվ պահպանել օրենսդրության գործող կարգերն ու պահանջները: Միաժամանակ խնդրում ենք հանրապետության բնակչությանը զգոն լինել և ուշադիր զննել ձեռք բերվող դեղորայքի պիտանելության ժամկետները. խախտումների առկայության դեպքում՝ հայտնել ԱՀ առողջապահության նախարարություն կամ զանգել շուրջօրյա գործող 3003 «թեժ գծին»»,-մասնավորապես ասել է Լ. Հովհաննիսյանը:
Նա տեղեկացրել է, որ հանրապետությունում նման ստուգումներ կիրականացվեն բոլոր դեղատներում: