2019 թվականի ընթացքում պարենային ապահովության ոլորտում իրականացված աշխատանքի արդյունքում հավաքագրվել են մեծ քանակությամբ վարչական և վիճակագրական հաշվետվություններ:
Անցած տարում իրականացվել են 6 վիճակագրական հետազոտություններ
ՍՏԵՓԱՆԱԿԵՐՏ, 11 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած ԱՀ Ազգային վիճակագրական ծառայության պետական խորհրդի նիստում ասել է ԱՎԾ նախագահ Մանուշ Մինասյանը:
Նրա խոսքով՝ հավաքագրվել, մշակվել և ամփոփվել են պարենային ապահովության վիճակագրությանն առնչվող մակրոտնտեսական, սոցիալական և ժողովրդագրական ոլորտների, աշխատանքի վիճակագրության, երեխաների խնամքի և պաշտպանության միջոցառումների, գների և գների ինդեքսների, գյուղատնտեսության, գյուղատնտեսական հողերի բարելավման, գյուղատնտեսական կենդանիների վարակիչ հիվանդությունների, բույսերի կարանտինի և պաշտպանության միջոցառումների, ագրոօդերևութաբանական տեղեկատվության, պարենամթերքի, արտաքին առևտրի, անտառպահպանության, անտառպաշտպանության և անտառվերականգնման միջոցառումների վերաբերյալ ցուցանիշները, որոնք տարեկան պարբերականությամբ հրապարակվել են «Պարենային ապահովություն» (հայերեն, անգլերեն) վիճակագրական տեղեկագրում: Հիմք ընդունելով միջազգային կազմակերպությունների կողմից ընդունված չափանիշները` կազմվել են 2018թ. առանձին ապրանքախմբերի պարենային հաշվեկշիռները: Ծրագրով նախատեսված բոլոր 6 վիճակագրական հետազոտությունները իրականացվել են:
Անդրադառնալով դրանց՝ ԱՎԾ նախագահն ընդգծել է հունվար-մարտ ամիսներին անցկացված բիզնես ռեգիստրի հետազոտությունը, հունիս-սեպտեմբեր ամիսներին անցկացված զբոսաշրջության, հունվար-փետրվար ամիսներին անցկացված անհատական բնակարանային շինարարության ընտրանքային, 2-րդ և 3-րդ եռամսյակներում անցկացված բեռնափոխադրումներ իրականացնող սուբյեկտների ընտրանքային հետազոտությունները: Բոլոր կատարված հետազոտություններից հետո հրապարակվել են համապատասխան զեկույցներ: Ծրագրից դուրս փետրվար-ապրիլ ամիսներին իրականացվել է նաև կրթական համակարգի ընտրանքային հետազոտություն, որի արդյունքներով ևս պատրաստվել է համապատասխան զեկույց: