ԱՀ ֆինանսների նախարարության համակարգի արդիականացումն ու տեղեկատվական տեխնոլոգիաների զարգացումն էական նշանակություն ունի կառույցի համար, ինչը հնարավորություն է տալիս հարկ վճարողներին մատուցել ժամանակակից տեխնոլոգիաների վրա հիմնված ծառայություններ` ապահովելով համակարգի կողմից իրականացվող աշխատանքների արդյունավետությունն ու թափանցիկությունը:
Կգործարկվի պետական վճարումների օն լայն կատարման hամակարգը. Արթուր Հարությունյան
ՍՏԵՓԱՆԱԿԵՐՏ, 29 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին այսօր կայացած մամուլի ասուլիսին ասել է ԱՀ ֆինանսների նախարար Արթուր Հարությունյանը:
Նա նշել է, որ 2019 թվականի հուլիսի 1-ից կատարված օրենսդրական փոփոխություններին համապատասխան՝ ներդրվել են էլեկտրոնային հարկային հաշիվների դուրս գրման և սոցիալական վճարների անձնավորված հաշվառման համակարգերը, ընդլայնվել՝ հարկային հաշվետվությունների էլեկտրոնային ներկայացման ու հարկային պարտավորությունների ավտոմատ հաշվառման համակարգերի շրջանակները:
«Կուտակային կենսաթոշակային համակարգի թափանցիկության ապահովման ու մասնակիցների տեղեկացվածության բարձրացման նպատակով գործարկվել է «Արցախի կուտակային կենսաթոշակային համակարգի մասնակցի անհատական հաշիվ» համակարգը, որի միջոցով քաղաքացիները կարող են տեղեկանալ իրենց կուտակային հատկացումների ճիշտ և ժամանակին փոխանցմանն ու կառավարման արդյունավետությանը: Դեկտեմբեր ամսում հնարավորություն է ստեղծվել կենսաթոշակային հաշիվները ստուգել նաև «Արցախբանկ» ՓԲԸ-ի բանկոմատների միջոցով, որոնցով հնարավոր է ստանալ անհատական կենսաթոշակային հաշվի մնացորդի, ինչպես նաև հաշվով կատարված վերջին 10 գործառնությունների պատմությունը: Առաջիկա օրերին կգործարկվի նաև պետական վճարումների օն լայն կատարման hամակարգը` այդպիսով կրճատելով դրանց վճարման համար ծախսվող ժամանակն ու ապահովելով ֆինանսական հոսքերի թափանցիկությունը: 2020 թվականի հունվարի 1-ի դրությամբ բոլոր հաշվետվությունները ներկայացվում են էլեկտրոնային եղանակով. օգտվողների թիվը կազմում է 3170 հարկ վճարող, որը կազմում է հաշվետվություն ներկայացնող հարկ վճարողների շուրջ 70 %-ը: Ընդ որում, ավելի քան 2530 հարկ վճարող կամ 80 %-ը կամավոր հիմունքներով է միացել հաշվետվությունների ներկայացման էլեկտրոնային համակարգին»,-մասնավորապես ասել է նախարարը:Ըստ Ա. Հարությունյանի՝ 2019 թվականին զգալի ուշադրություն է դարձվել նաև հարկային ծառայողների ուսուցման աշխատանքներին: Այդ առումով տարվա ընթացքում կենտրոնական ապարատի մասնագետների կողմից պարբերաբար կազմակերպվել են ուսուցողական դասընթացներ` օրենսդրական փոփոխությունների, հարկային հաշիվների էլեկտրոնային եղանակով դուրս գրման և սոցիալական վճարների անձնավորված հաշվառման համակարգերի հետ աշխատանքների կազմակերպման թեմաներով:
«Տարվա ընթացքում կազմակերպվել են նաև 2 մրցույթներ, այդ թվում՝ կրկնակի, որոնց արդյունքում համակարգը համալրվել է 3 նոր հարկային ծառայողներով»,-հավելել է նախարարը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -39-:
