2019 թվականին Արցախի Հանրապետության տարածք ապրանքանյութական արժեքների ներմուծման ծավալները կազմել են 144 մլրդ 777.6 մլն դրամ` նախորդ տարվա 125 մլրդ 614.3 մլն դրամի դիմաց:
Ապրանքանյութական արժեքների ներմուծման ծավալները հանրապետությունում կազմել են 144 մլրդ 777.6 մլն դրամ. նախարար
ՍՏԵՓԱՆԱԿԵՐՏ, 29 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին այսօր կայացած մամուլի ասուլիսին ասել է ԱՀ ֆինանսների նախարար Արթուր Հարությունյանը՝ նշելով, որ նույն ժամանակահատվածում արտահանման ծավալները կազմել են 122 մլրդ 750.8 մլն դրամ` նախորդ տարվա 102 մլրդ 633.9 մլն դրամի դիմաց:
Նախարարի խոսքով՝ զգալի աշխատանքներ են տարվել նաև հարկ վճարողների կուտակած պարտավորությունների նվազեցման ուղղությամբ:
«Այս առումով կարևոր նշանակություն է ունեցել «Հարկային և այլ պարտադիր վճարների գծով արտոնություններ սահմանելու մասին» օրենքը: Թվով 1930 հարկ վճարողների հետ կնքվել են պարտավորությունների մարման 12-ամսյա և 24-ամսյա տևողությամբ ժամանակացույցեր, որոնց համաձայն 2019 թվականի ընթացքում վերջիններիս կողմից մարվել են 16 մլրդ 964.6 մլն դրամի պարտավորություններ, այդ թվում` կնքված ժամանակացույցերի գումարներից` 1 մլրդ 527.8 մլն դրամ, որի արդյունքում 628 հարկ վճարողներ ազատվել են շուրջ 800 մլն դրամի տույժերի և տուգանքների վճարումից: Պարտավորություններ կուտակած հարկ վճարողներին պարբերաբար ներկայացվել են նաև ծանուցումներ, իրականացվել վճարունակության ուսումնասիրություններ, կիրառվել արգելադրումներ, ներկայացվել դատական հայցեր»,-մասնավորապես ասել է Ա. Հարությունյանը:
Նա տեղեկացրել է նաև, որ ընդհանուր իրավասության առաջին ատյանի դատարան է ներկայացվել թվով 61 հայց` 253.3 մլն դրամ հայցապահանջի գումարով: Ներկայացված հայցերի մասով (այդ թվում` նախորդ տարիների մասով) դատական մարմինների կողմից հաշվետու տարում կայացվել է 29 վճիռ` 386.3 մլն դրամ ընդհանուր գումարով:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -34-:
