Artsakhpress

Հասարակական

Բանակը հայ հասարակության հիմնասյունն է, երկրի ու ժողովրդի պաշտպանն ու ապավենը. նախարար (լուսանկարներ)

Այսօր՝ հունվարի 28-ին, ԱՀ պաշտպանության և մշակույթի, երիտասարդության հարցերի և զբոսաշրջության նախարարությունների համատեղ նախաձեռնությամբ Ստեփանակերտի մշակույթի և երիտասարդության պալատում կայացել է հայրենյաց պաշտպանի օրվան նվիրված տոնական միջոցառում:

Բանակը հայ հասարակության հիմնասյունն է, երկրի ու ժողովրդի պաշտպանն ու ապավենը. նախարար (լուսանկարներ)

Բանակը    հայ  հասարակության  հիմնասյունն  է, երկրի  ու  ժողովրդի  պաշտպանն  ու  ապավենը. նախարար  (լուսանկարներ)
ՍՏԵՓԱՆԱԿԵՐՏ, 28 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ հանդիսավոր միջոցառմանը ողջույնի և շնորհավորանքի խոսքով հանդես է եկել ԱՀ պաշտպանության նախարար, գեներալ-լեյտենանտ Կարեն Աբրահամյանը:
Նա ասել է, որ, դասեր քաղելով հազարամյակներ տևած արտաքին սպառնալիքներից, անցնելով արցախյան գոյամարտի թոհուբոհով, թրծվելով 2016 թվականին տեղի ունեցած ապրիլյան պատերազմում, հայ ժողովրդի համար ճակատագրական ժամանակներում բացահայտեցին մերօրյա հայրենյաց պաշտպանին, խորացան նրա էության մեջ և առանձնացրեցին հետևյալ արժանիքները. անսահման հայրենասիրությունը, որդիական պարտքի խորը զգացումը Մայր հայրենիքի հանդեպ և հանուն գաղափարի ինքնազոհաբերվելու կարողությունը:
 
«Այդ արժանիքներն ազգի պատմական հիշողության շնորհիվ փոխանցվում են սերնդեսերունդ և կանգուն պահում հայոց տունը: «Հայրենյաց պաշտպան» հասկացությունն ուղիղ այնքան տարեկան է, որքան տարիք ունի հայ ժողովուրդը: Մենք պետք է միշտ ճիշտ ընկալենք և սերնդեսերունդ փոխանցենք այն ճշմարտության իմաստը, որ հայրենիքի պաշտպանը միայն զինվորականը չէ, և միայն նա չէ, ով կրում է համազգեստ և ունի ուսադիր: Բանակը հայ հասարակության հիմնասյունն է, երկրի ու ժողովրդի պաշտպանն ու ապավենը: Մեր տարածաշրջանում անհրաժեշտ է ունենալ հզոր բանակ, որն էլ համարում ենք մեր նորանկախ պետության գրավականը»,-նշել է նախարարը:
 
Նա ավելացրել է, որ 2019 թվականը ԱՀ պաշտպանության նախարարության համար բեկումնային և աննախադպ տարի էր բոլոր ուղղություններով. այդ թվում՝ ՀՀ զինված ուժերի ղեկավարության հետ համագործակցության շրջանակներում պաշտպանության բանակին ցուցաբերած զգալի ֆինանսական և նյութատեխնիկական աջակցության տեսանկյունից: Կ. Աբրահամյանն իր անձնակազմի անունից շնորհակալություն է հայտնել ՀՀ ռազմաքաղաքական ղեկավարությանը և հավելել, որ այդ միջոցներն ուղղվել են բանակի սոցիալական ոլորտի աշխուժացմանը ու մարտական ներուժի զարգացմանը՝ իրապես նպաստելով մարտունակության բարձրացմանը։
 
ՀՀ զինված ուժերի գլխավոր շտաբի պետ, գեներալ-լեյտենանտ Արտակ Դավթյանը, իր հերթին շնորհավորելով միջոցառման մասնակիցներին, ասել է, որ հայ ժողովուրդը ջանք ու եռանդ չի խնայել, որպեսզի կազմավորի զինված ուժեր:
 
«Բանակը, կազմավորվելով արցախյան հերոսամարտի ժամանակահատվածում, կայացավ և շարունակեց ապահովել մեր երկրի անվտանգությունն ու կայունությունը: Այո, դեռևս լուծված չէ Արցախի միջազգային ճանաչման հարցը, բայց մեր երկրների ղեկավարների քայլերով գնում ենք այդ խնդրի լուծման ուղղությամբ, որին պետք է նպաստեն զինված ուժերը, հարկ եղած դեպքում նաև պարտադրեն այդ հաղթանակը: Կրկին շնորհավորում եմ բոլորիս և վստահ եմ, որ միասնական ուժերով կկարողանանք լուծել բոլոր այն խնդիրները, որոնք դրված են Զինված ուժերի առջև: Մենք՝ որպես զինվորականներ, պետք է պատրաստ լինենք կատարելու մեր առաքելությունը»,- մասնավորապես ասել է Ա. Դավթյանը:
 
Շնորհավորական ելույթներից հետո տոնական երեկոն շարունակվել է համերգային ծրագրով, որի ընթացքում Արցախում գործող մշակութային համույթներն ու անհատ կատարողները հանդես են եկել հայրենասիրական երգերով և ազգագրական պարերով:
 
Միջոցառմանը ներկա էին Արցախի Հանրապետության նախագահ Բակո Սահակյանը, Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, ԱԺ նախագահ Աշոտ Ղուլյանը, պետնախարար Գրիգորի Մարտիրոսյանը, ՀՀ անվտանգության խորհրդի քարտուղար Արմեն Գրիգորյանը, պաշտոնատար այլ անձինք:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -62-:

     

Քաղաքական

Հասարակական

Ռազմական

Ամենադիտված

ամիս

շաբաթ

օր

Search