Հայաստանի Հանրապետությունից և արտասահմանյան տարբեր երկրներից ժամանած մասնագետների կողմից Արցախի Հանրապետության առողջապահության նախարարության մասնագետների հետ միասին «Բաց դռների օր» միջոցառումների շրջանակներում ինչպես Ստեփանակերտի, այնպես էլ հանրապետության տարբեր շրջանների բուժհիմնարկներում կատարվել է տարբեր հիվանդություններով տառապող մի շարք հիվանդների ընդունելություն. իրականացվել է 2418 խորհրդատվություն, 1557 հետազոտություն և 371 վիրահատություն։
«Բաց դռների օր» միջոցառումների շրջանակներում սպասարկվել են 4346 քաղաքացիներ.նախարար
ՍՏԵՓԱՆԱԿԵՐՏ, 24 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ այս մասին այսօր՝ հունվարի 24-ին կայացած մամլո ասուլիսի ժամանակ ասել է ԱՀ առողջապահության նախարար Արայիկ Բաղրյանը:
Նա նշել է, որ բացի այդ, այցեր է կատարվել հանրապետության բոլոր շրջաններ՝ նախարարության գլխավոր խորհրդատուների ու բարձրակարգ բժիշկների մասնակցությամբ, որտեղ իրականացվել է արտագնա խորհրդակցություն համակարգի գործադիր տնօրենների հետ, ինչպես նաև գյուղական բնակչության շրջանում կազմակերպվել է 2500 անվճար ընդունելություն, հետազոտություն ու խորհրդատվություն։ Ակնաբուժական խնդիրներ ունեցող ավելի քան 400 անձանց տրամադրվել են նաև ակնոցներ։
«ԱՄՆ «Adventist Health Glendale» բժշկական կենտրոնից, Ֆրեզնոյի բժշկական առաքելության և «Chevy Chase» կազմակերպության կողմից ժամանած մասնագետների խումբը Արցախի բուժհաստատություններում «Բաց դռների օր» միջոցառումների շրջանակներում իրականացրել են բարդ վիրահատական միջամտություններ. վիրահատությունների մի մասն Արցախում կատարվել է առաջին անգամ: Այցի շրջանակներում, հյուրերն Արցախի Հանրապետություն են բերել տարբեր տեսակի բժշկական պարագաներ ու դեղորայք, որի մի մասը օգտագործվել, իսկ մյուս մասը տրամադրվել է բուժհիմնարկներին։ Սկսած 2019 թվականից «Արաբկիր» միացյալ մանկական բարեգործական հիմնադրամի ու Ամերիկյան «Starkey» ընկերության կողմից Արցախի Հանրապետության ավելի քան 800 քաղաքացիների հաշվառել ու բարեգործական հիմունքներով տրամադրվել են լսողական սարքեր։ 2019 թվականին, ընդհանուր առմամբ, բարեգործական հիմունքներով ԱՀ առողջապահության նախարարությանն է տրվել 544 մլն դրամ արժողությամբ դեղորայք ու բժշկական նշանակության ապրանքներ»,-ավելացրել է Ա. Բաղրյանը։
