2020 թվականի հունվարի 22-ի տվյալներով` Արցախի բուժկանխարգելիչ հիմնարկներում վերին շնչառական ուղիների սուր վարակներ ախտորոշմամբ ամբուլատոր դիմելիությունը կազմել է 81 դեպք, որից 60-ը` երեխաներ:
Սուր շնչառական վարակների համաճարակաբանական վիճակը վերահսկվում է. տեսչության պետ
ՍՏԵՓԱՆԱԿԵՐՏ, 22 հունվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ առողջապահության նախարարության պետական հիգիենիկ և հակահամաճարակային տեսչության պետ Օֆելյա Հարությունյանը՝ մանրամասնելով, որ ստացիոնար բուժում են ստացել 11 հիվանդներ, որոնցից 9-ը՝ երեխաներ: «Հանրապետությունում գրանցվել է թոքաբորբի 2 դեպք՝ մեծահասակների մոտ:
Նախորդ տարվա նույն ժամանակահատվածի տվյալների համեմատ` «Վերին շնչառական ուղիների սուր վարակներ» ախտորոշմամբ ամբուլատոր և ստացիոնար բուժում ստացողների թիվը նվազել է 3,5 անգամ, թոքաբորբով հիվանդների թիվը՝ 6 անգամ: ԱՀ առողջապահության նախարարության կողմից իրականացվում են ամենօրյա մշտադիտարկումներ, կազմակերպվում համալիր միջոցառումներ բուժսպասարկման բոլոր օղակներում: Հաշվի առնելով գրիպի և սուր շնչառական վարակների փոխանցման օդակաթիլային մեխանիզմը՝ հորդորում ենք գրիպանման երևույթների առկայության դեպքում մնալ տանը, չհաճախել աշխատանքի, բարձրագույն ուսումնական հաստատություն, դպրոց և մանկապարտեզ, չմասնակցել զանգվածային միջոցառումներին, որը կարող է պատճառ դառնալ հիվանդության տարածման ու նոր դեպքերի առաջացման, չշփվել գրիպով հիվանդ անձանց հետ:
Գրիպով հիվանդը շրջապատի մարդկանցից պետք է պահպանի երկու մետր հեռավորություն, չզբաղվի ինքնաբուժմամբ, անհարկի չօգտագործի հակաբիոտիկներ և ժամանակին դիմի բժշկի: Պետք է պահպանել հազալու և փռշտալու կանոնները, խստորեն հետևել հիգիենային, հագնվել եղանակին համահունչ, հաճախակի օդափոխել փակ տարածքները»,- մասնավորապես ասել է Օ. Հարությունյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -21-: