Բելգիայի հայկական կոմիտեի առաքելության և Արցախի հետ համագործակցության մասին՝ «Արցախպրես»-ի թղթակիցը զրուցել է կառույցի ղեկավար Նիկոլա Դավիդյանի հետ:
Բելգիայում ապրող հայերի համար Արցախն առաջնահերթություն է. Նիկոլա Դավիդյան
ՍՏԵՓԱՆԱԿԵՐՏ, 14 հունվարի, ԱՐՑԱԽՊՐԵՍ: Ստորև ներկայացնում ենք հարցազրույցն ամբողջությամբ.
- Պրն Նիկոլա Դավիդյան, Բելգիայի հայկական կոմիտեն ո՞ր թվականից է սկսել իր աշխատանքները, ո՞րն է հիմնական առաքելությունը և հիմնականում ի՞նչ բնույթի գործունեություն է ծավալում:
-Բելգիայի հայկական կոմիտեն ստեղծվել է 1922 թվականին, Հայոց ցեղասպանությունից մազապուրծ փրկվածների կողմից: Նրանց առաքելությունը Բելգիայում հայերին ներկայացնելն է, պահպանելը նրանց ինքնությունը, մշակույթը: Համայնքը ընտրում է ասամբլեա, որն իր հերթին ընտրում է համայնքի նախագահին և անդամներին: Պետք է նշել, որ համայնքային այս հաստատությունները չեն փոխարինում միավորումներին (ասոցիացիաներ), կուսակցություններին կամ եկեղեցուն: Դա լոկ կենտրոնական կազմակերպություն է, որն իր շուրջն է հավաքում բոլորին: Նոր կոմիտեն ստեղծվել է 2019 թվականի փետրվարին: Համայնքը բազմազան գործունեություն է ծավալում:
Մենք շատ հարցերում նախաձեռնողականություն ենք ցուցաբերում. այդպիսի դրսևորում կարելի է համարել 1915 թվականին իրականացված Հայոց ցեղասպանության զոհերի հիշատակը հարգող միջոցառումները, համահայկական ասոցիացիաների հանդիպումը երկրում և այլն:
Բացի դրանից, համայնքային հաստատությունները Բրյուսելում կարողանում են իրականացնել մշակութային մի շարք միջոցառումներ և կրթական ծրագրեր: Օրինակ՝ ներկայումս մենք կազմակերպում ենք կոչում Բելգիայի ֆրանսախոս դպրոցներում Հայոց ցեղասպանության մասին պատմող դասընթացներ:
-Բելգիայի հայկական կոմիտեն քանի՞ անդամ ունի. միայն հայե՞ ր են, թե՞ նաև օտարազգիներ:
-Կոմիտեն բաղկացած է 12 անդամից, բոլորն էլ հայեր են: Կոմիտեն ներառում է Բելգիայում ապրող բոլոր այն հայ ընտանիքները՝ ովքեր ունեն հայկական ծագում:
-Բելգիայում որքա՞ն հայ է ապրում: Հիմնականում ինչպիսի՞ գործունեություն են ծավալում և ի՞ նչ խնդիրներ ունեն:
- Բելգիայում ապրում է մոտ 30 հազար հայ: Նրանք տեղափոխվել են Թուրքիայից, Լիբանանից, Հայաստանից և այլ վայրերից: Կան ասոցիացիաներ Օստենդենում, Արևմտյան ափում, Լիեժում, Գերմանիայի մերձակայքում, Արևելքում, Նամուռում, Անտվերպենում և այլուր: Համալսարանում կան նաև հայ երիտասրդ մասնագետների ասոցիացաներ, եկեղեցական (կաթոլիկ և բողոքական), քաղաքական կուսակցություններ, որոնք անգնահատելի աշխատանք են կատարում հայապահպանության գործում: Նրանք հիմնականում կազմակերպում են դասընթացներ տեղաբնակ հայ երեխաների համար, դասավանդում հայոց լեզու, ապահովում մշակութային կյանքը՝ ուսուցանելով երգ, պար և այլն, ինչպես նաև նախաձեռնում սոցիալական բնույթի միջոցառումներ, հիշատակության օրեր, ճաշկերույթներ:
-Համագործակցու՞մ եք Արցախի հետ, և ինչքանո՞վ եք այն կարևորում:
-Բելգիայում ապրող հայերի համար Արցախն առաջնահերթություն է: Այդպես է համարում նաև մեր կոմիտեն: 2016 թվականի ապրիլյան քառօրյա պատերազմից հետո շատ ասոցիացիաներ և անհատներ կազմակերպել են օգնություն զինվորների ընտանիքներին: Որոշները իրականացնում են տարբեր ծրագրեր Արցախում: Քաղաքական մակարդակում, այնուամենայնիվ, Հայ դատը, շոշափելի աշխատանք է իրականցնում: Կազմակերպվել է շրջանային և ազգային պառլամենտների ուղևորություն դեպի Արցախ, գործում են Արցախի հետ բարեկամության խմբեր շրջանային պառլամենտներում:
Բելգիայի հայկական կոմիտեն աջակցում է Հայ դատի գործունեությանը:
-Տեղյակ ենք, որ Հայոց Ցեղասպանության ճանաչման հարցով ևս զբաղվում եք: Ի՞ նչ արդյունքներ եք արձանագրել, և առաջիկայում ի՞ նչ է նախատեսվում:
- 1915 թվականի Հայոց ցեղասպանությունը Բելգիայի սենատի կողմից ընդունվել է 1998 թվակնին: 2015 թվականին Բելգիայի ներկայացուցիչների պալատը նույնպես ընդունել է այն: Անցած տարի Բելգիայի պառլամենտն ընդունել է նաև ցեղասպանությունները ժխտող օրենք: Այն արգելում է ժխտել ցեղասպանությունները Ռուանդայում (Աֆրիկա) և Սրեբրենիկում (Հերցեգովինա): Հիմա աշխատում ենք փոփոխություն մտցնել այդ օրենքում, որպեսզի Հայոց ցեղասպանությունը ևս ներառվի:
Հայկական համայնքները շատ կարևոր են հայ ազգի համար, դրանք գործում են զարգացած և ապահով երկրներում, և ՀՀ-ի համար հանդիսանում են բաց պատուհան դեպի արտաքին աշխարհ: Սփյուռքի գաղթօջախների և Մայր հայրենիքի սերտ համագործակցության արդյունքում է, որ դրսում ապրող հայ երիտասարդները հպարտություն են ապրում հայ լինելու համար:
Այսպիսով՝ Բելգիայի հայկական համայնքը՝ որպես զարգացած, գործող կառույց փորձում է առավելագույնս ներկայացնել Արցախն ու Հայաստանը Բելգիայում:
Հարցազրույցը՝ Վեհանուշ Հովսեփյանի
