Այսօր նշանավոր հայ դերասան, ԽՍՀՄ ժողովրդական արտիստ Մհեր Մկրտչյանի հիշատակի օրն է:
Այսօր Մհեր Մկրտչյանի հիշատակի օրն է
ՍՏԵՓԱՆԱԿԵՐՏ, 28 դեկտեմբերի, ԱՐՑԱԽՊՐԵՍ։ «Մհեր Մկրտչյան» արտիստական թատրոնը ֆեյսբուքյան էջում հոլովակ է հրապարակել:
Մհեր Մկրտչյանը ծնվել է Գյումրիում՝ 1930 թվականին: Դեռևս մանուկ հասակում Մկրտչյանը սկսել է աշխատել Լենինականի տեքստիլ կոմբինատում: Պատերազմի տարիներին նա կինոմեխանիկի աշակերտ էր: Հենց այդկինոմեխանիկն էլ մի օր նրա ձեռքը բռնել և տարել է ինքնագործ խմբի բեմ, որտեղ Մհեր Մկրտչյանն առաջին անգամ ծիծաղեցրել է հանդիսատեսին: Այդտեղից էլ սկսվել է նրա թատերական կյանքը:
«Ամեն անգամ, երբ հիշում եմ իմ մանկությունը, չգիտեմ ինչու այն ներկայանում է ինձ հեծանիվ քշող փոքրիկ տղայի տեսքով: Գուցե նրանից է, որ մանկության տարիներին միակ երազանքս հեծանիվ ունենալն էր, որն այդպես էլ չունեցա: Ժամերով կագնում էի խանութի ցուցափեղկի առաջ և երազում: Մայրս իր չորս որբերին հազիվ էր կերակրում, էլ ուր մնաց թե հեծանիվ գներ ինձ»,- մի առիթով ասել է Մկրտչյանը:
Մհեր Մկրտչյանը խաղացել է բազմաթիվ ֆիլմերում, կերտել դերեր, որոնք անմոռաց են հանդիսատեսի հուշերում:
Նա փայլուն է մարմնավորել Արսենին «Նվագախմբի տղաները» ֆիլմում, Գասպարին՝ «Եռանկյունի»-ում, Իշխանին` «Մենք ենք, մեր սարերը» ֆիլմում, Գրիգոր աղային` «Կտոր մը երկինք»-ում և այլն:
1978 թվականին Մհեր Մկրտչյանն արժանացել է ԽՍՀՄ, իսկ 1979 թվականին` ՀԽՍՀ Պետական մրցանակների: 2001 թվականին նա հետմահու պարգևատրվել է Սուրբ Մեսրոպ Մաշտոցի շքանշանով:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -36-: